ഗവ. ഹോമിയോ ആശുപത്രി ചോക്കാട്ടുനിന്ന്​ മാറ്റുന്നതിനെതിരെ ജനകീയ സമിതി

മമ്പാട്ടുമൂലയിലേക്ക് മാറ്റാനാണ് പഞ്ചായത്ത് അധികൃതരുടെ തീരുമാനം കാളികാവ്: ചോക്കാട്‌ അങ്ങാടിയിൽ പ്രവർത്തിക്കുന്ന ഗവ. ഹോമിയോ ഡിസ്പെൻസറി സ്ഥലംമാറ്റുന്നതിനെതിരെ പ്രതിഷേധവുമായി ജനകീയ സമിതി രംഗത്ത്. പഞ്ചായത്ത് അധികൃതരുടെ തീരുമാനം പുനഃപരിശോധിക്കണമെന്ന് സമിതി വാർത്തസമ്മേളനത്തിൽ ആവശ്യപ്പെട്ടു. 10 വർഷത്തിലേറെയായി ചോക്കാട് അങ്ങാടിക്ക്​ സമീപം പ്രവർത്തിക്കുന്ന സ്ഥാപനം മമ്പാട്ടുമൂലയിലേക്ക് മാറ്റാനാണ് തീരുമാനം. മമ്പാട്ടുമൂലയിലെ പ്രവാസി സംഘടന കഴിഞ്ഞ ദിവസം ഏഴു സെന്‍റ്​ സ്ഥലം പഞ്ചായത്തിന് നൽകിയിരുന്നു. ഇതിന്‍റെ രേഖകൾ എ.പി. അനിൽ കുമാർ എം.എൽ.എ മുഖാന്തരം പഞ്ചായത്തിന്​ കൈമാറിയിരുന്നു. ചടങ്ങിൽവെച്ച് 30 ലക്ഷം രൂപ കെട്ടിട നിർമാണത്തിന് എം.എൽ.എ വാഗ്ദാനം നൽകുകയും ചെയ്തു. അതേസമയം, ഏലച്ചോല അബ്ദുറഹിമാൻ 2019ൽ ചോക്കാട് പഞ്ചായത്ത് ഓഫിസിനു​ സമീപം ഹോമിയോ ഡിസ്പെൻസറിക്കുവേണ്ടി അഞ്ചു സെന്‍റ്​ സൗജന്യമായി നൽകാൻ തയാറാണെന്ന് പഞ്ചായത്തിന് രേഖാമൂലം കത്ത് നൽകിയിരുന്നു. ഈ സ്ഥലം നിലമായതിനാൽ തരംമാറ്റി കിട്ടുന്ന മുറക്ക് ഏറ്റെടുക്കാമെന്ന്​ പഞ്ചായത്ത് മറുപടി നൽകിയിരുന്നതാണ്. പിന്നീട് ഒരു അറിയിപ്പുമില്ലാതെ പഞ്ചായത്ത് ബോർഡ് ഡിസ്പെൻസറി മാറ്റിസ്ഥാപിക്കാൻ തീരുമാനമെടുക്കുകയായിരുന്നു. ഇത്​ ചോദ്യംചെയ്താണ് ജനകീയ സമിതി രംഗത്തുവന്നത്. അധികൃതർ തീരുമാനം മാറ്റിയില്ലെങ്കിൽ ജനകീയമായും നിയമപരമായും നടപടിയെ ചെറുക്കുമെന്ന് ഭാരവാഹികൾ പറഞ്ഞു. കെ.ടി. മുജീബ് (സി.പി.എം), മധു ജോസഫ് (കോൺഗ്രസ്), ടി.എ. സമീർ (മുസ്​ലിം ലീഗ്), മരുതത്ത് ചെറിയാപ്പു (സി.പി.ഐ), വാർഡ് മെംബർ എം. അൻവർ, കെ.എം. സലാഹുദ്ദീൻ, കെ. രാമകൃഷ്ണൻ എന്നിവർ വാർത്തസമ്മേളനത്തിൽ പങ്കെടുത്തു.