നാട്ടുവൈദ‍്യന്‍റെ മൃതദേഹം വെട്ടിനുറുക്കാനുള്ള തടിക്കഷ്ണം വാങ്ങിയത് മരവ്യാപാരിയിൽനിന്ന്​

നിലമ്പൂർ: നാട്ടുവൈദ‍്യൻ ഷാബാ ശെരീഫിനെ കൊലപ്പെടുത്തിയ ശേഷം ശരീരഭാഗങ്ങൾ വെട്ടിനുറുക്കാനുള്ള തടിക്കഷ്ണം വാങ്ങിയത് മരവ്യാപാരിയിൽനിന്ന്​. നിലമ്പൂർ മുക്കട്ടയിലെ സ്വകാര‍്യവ‍്യക്തിയുടെ പറമ്പിലുള്ള പുളിമരത്തിൽനിന്നുള്ള കഷ്ണമാണ്​ വാങ്ങിയത്. മുഖ‍്യപ്രതി ഷൈബിൻ അഷ്​റഫിന്‍റെ നിർദേശപ്രകാരം 1500 രൂപക്ക് കച്ചവടം ഉറപ്പിച്ചത്​ കസ്റ്റഡിയിലുള്ള നൗഷാദാണ്. നൗഷാദും ഒളിവിൽ പോയ കൂട്ടുപ്രതി ഫാസിലുമാണ് തടിക്കഷ്ണം വാങ്ങി കാറിൽ കൊണ്ടുപോയത്. മരത്തിന്‍റെ ബാക്കി ഭാഗങ്ങൾ കച്ചവടക്കാരൻ മറിച്ചു വിൽക്കുകയായിരു​ന്നു. നൗഷാദിന്‍റെ മൊഴിപ്രകാരം കച്ചവടക്കാരനെ സ്റ്റേഷനിൽ വിളിച്ചുവരുത്തി. വിവരം ശേഖരിച്ച ശേഷം നിലമ്പൂർ സി.ഐ പി. വിഷ്ണുവിന്‍റെ നേതൃത്വത്തിൽ സ്വകാര‍്യവ‍്യക്തിയുടെ പറമ്പിലെത്തി മഹസർ തയാറാക്കി. മൃതദേഹഭാഗങ്ങൾ ഷൈബിൻ അഷ്​റഫിന്‍റെ വീട്ടിലെ ശുചിമുറിയിൽനിന്ന്​ കഷ്ണങ്ങളാക്കിയ ശേഷം തടിക്കഷ്ണം എവിടെ ഉപേക്ഷിച്ചെന്ന് തനിക്കറിയില്ലെന്നാണ് നൗഷാദിന്‍റെ മൊഴി. ഇത്​ ഷൈബിൻ നശിപ്പിച്ചിട്ടുണ്ടാവുമെന്നാണ് കരുതുന്നത്. കസ്റ്റഡിയിലുള്ള നൗഷാദിനെ നിലമ്പൂർ സ്റ്റേഷനിൽ ചോദ‍്യംചെയ്തുവരുകയാണ്. വ‍്യാഴാഴ്ചയാണ് അഞ്ചു​ ദിവസത്തേക്ക് പൊലീസ് കസ്റ്റഡിയിൽ വാങ്ങിയത്. തിങ്കാളാഴ്ച കസ്റ്റഡി കാലാവധി കഴിയും. Nbr Mardar Photo-1 മൃതദേഹം കഷ്ണങ്ങളാക്കാൻ വാങ്ങിയ പുളിമരത്തിന്‍റെ മഹസർ പൊലീസ് തയാറാക്കുന്നു