അനധികൃതമായി വായ്പ നൽകി, പിന്നീട് എഴുതിത്തള്ളുകയും ചെയ്തു; കോഴിക്കോട് കാരശ്ശേരി സഹകരണ ബാങ്കിൽ വിജിലൻസ് പരിശോധന

കോഴിക്കോട്: കോഴിക്കോട് കാരശ്ശേരി സഹകരണ ബാങ്കിൽ വിജിലൻസ് പരിശോധന. അനധികൃത ലോണുകളെ കുറിച്ചുള്ള കേസിന്റെ പരിശോധനയുടെ ഭാഗമായാണ് വിജിലൻസ് എത്തിയത് എന്നാണ് സൂചന. വിജിലൻസ് ഡി.​വൈ.എസ്. ശിവപ്രസാദിന്റെ നേതൃത്വത്തിലായിരുന്നു പരിശോധന നടത്തിയത്.

സഹകരണ ബാങ്ക് ചെയർമാൻ അബ്ദുറഹ്മാൻ അനധികൃതമായി ലോണുകൾ നൽകിയെന്ന് നേരത്തേ പരാതികളുയർന്നിരുന്നു. ഈ ലോണുകളെല്ലാം എഴുതിത്തള്ളിയെന്നും പരാതിയുണ്ട്. തുടർന്നാണ് വിജിലൻസ് കാരശ്ശേരി ബാങ്കിൽ മിന്നൽ പരിശോധന നടത്തിയത്.

കാരശ്ശേരി സഹകരണ ബാങ്കുമായി ബന്ധപ്പെട്ട് മുമ്പും പരാതികളുയർന്നിരുന്നു. തെരഞ്ഞെടുപ്പുമായി ബന്ധപ്പെട്ട് കരട് വോട്ടർപട്ടികയുടെ ലിസ്റ്റ് കിട്ടിയില്ലെന്ന് പറഞ്ഞ് സി.പി.എം, കോൺഗ്രസ് പ്രവർത്തകർ തമ്മിൽ ഏറ്റുമുട്ടലുമുണ്ടായിരുന്നു.