മൈസൂരു ലോഡ്ജില്‍ പണം കവര്‍ച്ച: മൂന്നംഗ സംഘം പിടിയില്‍

വടകര: മൈസൂരുവിലെ ലോഡ്ജില്‍ തടവില്‍ പാര്‍പ്പിച്ച് വടകര സ്വദേശിയുടെ പണം കവര്‍ന്ന സംഭവത്തില്‍ മൂന്നംഗ സംഘം പൊലീസ് പിടിയിൽ. മൈസൂരുവില്‍ താമസക്കാരായ പാലക്കാട്​ സ്വദേശി സമീര്‍, കണ്ണൂര്‍ അഷ്റഫ്, വിരാജ്പേട്ടയില്‍ താമസിക്കുന്ന കണ്ണൂര്‍ ഉനൈസ് എന്നിവരാണ് പിടിയിലായത്.

കഴിഞ്ഞ മാസം വടകരയിലേക്കു വരാൻ മൈസൂരു ബസ്​സ്​റ്റാൻഡിൽ രാത്രി ബസ് കാത്തു നില്‍ക്കുകയായിരുന്ന യുവാവിനെയാണ് ഇവര്‍ തട്ടിക്കൊണ്ടുപോയത്.

മൈസൂരുവിലെ ലോഡ്ജില്‍ മൂന്നു ദിവസം തടവില്‍ പാര്‍പ്പിച്ചശേഷം പണം തന്നില്ലെങ്കില്‍ പോക്സോ കേസില്‍ പ്രതിയാക്കുമെന്ന് ഭീഷണിപ്പെടുത്തുകയായിരുന്നു. മർദിക്കുകയും പ്രകൃതിവിരുദ്ധ ലൈംഗികപീഡനത്തിനിരയാക്കുകയും ചെയ്​തു. കൈയില്‍ പണമില്ലെന്ന്​ മനസ്സിലാക്കിയതോടെ സഹോദരനെ ഫോണില്‍ വിളിച്ച് ഭീഷണിപ്പെടുത്തി. വിട്ടയക്കാന്‍ 50,000 രൂപ ആവശ്യപ്പെടുകയായിരുന്നു.

പണം കൈക്കലാക്കിയശേഷമാണ് പ്രതികള്‍ യുവാവിനെ വിട്ടയച്ചത്. മൈസൂരുവിലെ ലോഡ്ജിലെ സി.സി.ടി.വി ദൃശ്യങ്ങള്‍ പരിശോധിച്ചും പ്രതികളുടെ ബാങ്ക് അക്കൗണ്ടും മൊബൈല്‍ ഫോണും കേന്ദ്രീകരിച്ചും നടത്തിയ അന്വേഷണത്തിലാണ് പ്രതികള്‍ വലയിലായത്.