'കോവിഡ്​ പരോളിൽ' ഇറങ്ങി; വാഹന മോഷണത്തിന്​ അറസ്​റ്റിൽ

കോഴിക്കോട്: 'കോവിഡ്​ പരോളിൽ' ജയിലിൽനിന്ന്​ ഇറങ്ങിയ ആളുൾപ്പെടുന്ന വാഹനമോഷണ സംഘത്തെ ടൗൺ പൊലീസ്​ അറസ്​റ്റുചെയ്​തു. ചോമ്പാല മുക്കാളി സ്വദേശി അൻസില മഹലിൽ ഷാഹിദ്​ (28), പരപ്പിൽ സ്വദേശി കെ.എ. ഹൗസിൽ ഹാബിൽ (21), പതിനാറുവയസ്സുകാരനായ ഒരാൾ എന്നിവരാണ്​ പിടിയിലായത്​. ഹിമായത്ത് സ്കൂളിനടുത്തുനിന്ന്​ മോഷണം പോയ ബൈക്കിനെ കുറിച്ചുള്ള അന്വേഷണത്തിലാണ്​ സംഘത്തെക്കുറിച്ചുള്ള വിവരങ്ങൾ പൊലീസിന്​ ലഭിച്ചത്​.

ശ്രീകണ്​ഠേശ്വര ക്ഷേത്രത്തിനടുത്തുനിന്ന്​ ബൈക്ക് മോഷ്​ടിച്ചതും വടകര കണ്ണൂക്കര പൂജ സൂപ്പര്‍ സ്​റ്റോറി​െൻറ ഷട്ടര്‍ പൊളിച്ച് 43,000 രൂപയുടെ സിഗരറ്റ് കവർന്നതും ഇവരാണെന്ന് അന്വേഷണത്തില്‍ വ്യക്തമായി. രണ്ടു ബൈക്കുകളും ബൈക്കില്‍നിന്ന് എടുത്തുപേക്ഷിച്ച പാലിയേറ്റീവ് കെയറി​െൻറ രശീത് ബുക്കുകളും മറ്റും ഇവരില്‍നിന്ന് കണ്ടെത്തി. ഷാഹിദ് കളവു കേസിലും പൊലീസിനെ ആക്രമിച്ച കേസിലും അറസ്​റ്റിലായി കണ്ണൂര്‍ സെന്‍ട്രൽ ജയിലില്‍ ശിക്ഷ അനുഭവിക്കുകയായിരുന്നു.

കോവിഡ്​ കാലത്തെ പ്രത്യേക പരോളിൽ പുറത്തിറങ്ങിയപ്പോഴാണ്​ വീണ്ടും അറസ്​റ്റിലായത്​. മോഷണം നടത്തിയ ശേഷം ബാലുശ്ശേരിയിലെ ചിക്കൻ സ്​റ്റാളിൽ ജോലിക്ക്​ കയറിയിരുന്നു. ടൗണ്‍ സി.​െഎ എ. ഉമേഷിന്​ കിട്ടിയ രഹസ്യ വിവരത്തി​െൻറ അടിസ്ഥാനത്തില്‍ എസ്​.​െഎ കെ.ടി. ബിജിത്ത്, എസ്​.​െഎ എ. അനില്‍ കുമാര്‍, എ.എസ്​.​െഎ സുനില്‍കുമാര്‍, സജേഷ്കുമാര്‍, അനൂജ് എന്നിവര്‍ ചേർന്നാണ്​ പ്രതികളെ പിടികൂടിയത്​.