പ്ലസ് ടുവിൽ കാലിടറിയത്​ കാര്യാമാക്കേണ്ട, കൈപിടിച്ചുയർത്താൻ ഉയരെയുണ്ട്

കോഴിക്കോട്​: പ്ലസ്ടു രണ്ടാംവർഷ പരീക്ഷയിൽ കാലിടറിയ വിദ്യാർഥികളെ കൈപിടിച്ചുയർത്താൻ ഉയരെ പദ്ധതിയുമായി അധ്യാപകർ. സയൻസ്, കോമേഴ്സ്, ഹ്യുമാനിറ്റീസ് വിഭാഗത്തിൽ ഉപരിപഠനത്തിന്​ യോഗ്യത നേടാതെ പോയവരെ വിജയിപ്പിച്ചെടുക്കുന്നതിനുള്ള പദ്ധതി ചൊവ്വാഴ്​ച തുടങ്ങും.

UYARE (അൺലോക്​ യുവർ ആസ്​പിരേഷൻസ്​ ടു റീബിൽഡ്​ ആൻഡ്​ എംപവർ) എന്നു പേരിട്ട നൂതനപദ്ധതി പൊതുവിദ്യാഭ്യാസ വകുപ്പിനു കീഴിൽ കോഴിക്കോട്​ ജില്ലയിലെ ഹയർസെക്കൻഡറി വിഭാഗം കരിയർ ഗൈഡൻസ് ആൻഡ്​ അഡോൾസെൻറ്​​ കൗൺസലിങ്​ സെല്ലാണ്​ സംസ്ഥാനത്താദ്യമായി തുടക്കമിട്ടത്​.

സെപ്​റ്റംബർ 22ന് തുടങ്ങുന്ന പ്ലസ്ടു സേ പരീക്ഷക്ക്​ വിദ്യാർഥികളെ പ്രാപ്തരാക്കുകയാണ് ലക്ഷ്യം. സയൻസിലും കോമേഴ്സിലും ഹ്യുമാനിറ്റീസിലുമായി ഈ യോഗ്യത നേടാതെ പോയവ​െ​ര ജില്ലയിലെ പ്രഗല്​ഭ അധ്യാപകരുടെ ഒരുമാസത്തെ സ്പെഷൽ ക്രാഷ്​ കോഴ്​സ്​ വഴിയാണ്​ സജ്ജരാക്കുന്നത്​. ജില്ലയിലെ 150ലധികം ഗവ. എയ്ഡഡ് വിദ്യാലയങ്ങളിലെ യോഗ്യത നേടാതെപോയ വിദ്യാർഥികളാണ് ഉയരെ പദ്ധതിയുടെ ഗുണഭോക്താക്കൾ. ഓരോ വിദ്യാലയത്തിലെയും പ്രിൻസിപ്പൽമാരും കരിയർ/സൗഹൃദ കോഓഡിനേറ്റർമാരും മറ്റ് അധ്യാപകരും പദ്ധതി ഇതിനകം നടപ്പാക്കിക്കഴിഞ്ഞു.

ഒരു വിഷയം മാത്രം നഷ്​ടപ്പെട്ടവർ, വീട്ടിലെ പ്രതികൂല സാഹചര്യങ്ങൾ കാരണം പരീക്ഷ ശരിയായ രീതിയിൽ എഴുതാൻ കഴിയാതെപോയവർ, കൗമാര ചതിക്കുഴികളിൽ പെട്ടുപോയവർ എന്നിങ്ങനെ വിവിധ കാരണങ്ങളാൽ കടമ്പ കടക്കാൻ കഴിയാതെ പോയവരാണ്​ കൂട്ടത്തിൽ മിക്കവരു​ം. പദ്ധതിയുടെ ഭാഗമായ വിദ്യാർഥികളെ ഒരു പ്ലാറ്റ് ഫോമിൽ കൊണ്ടുവന്ന് വിഷയാധിഷ്​ഠിത ഗ്രൂപ്പുകളാക്കുകയും, 10 കുട്ടികൾക്കായി ഒരു മെൻറർ എന്ന നിലയിലേക്ക്​ മാറ്റിയ​ുമാണ്​ പഠിപ്പിക്കുന്നത്​.

സംസ്ഥാനത്താകെ ഈ വർഷം പ്ലസ് ടു പരീക്ഷയിൽ 85.13ശതമാനം വിദ്യാർഥികളാണ് ഉപരിപഠനത്തിന് യോഗ്യത നേടിയിരുന്നത്. ആകെ പരീക്ഷയെഴുതിയ 3,75,655 വിദ്യാർഥികളിൽ 55,873 പേർക്ക്​ ഉപരിപഠനത്തിന് യോഗ്യത നേടാനായില്ല. ജില്ലയിൽ ആകെ പരീക്ഷയെഴുതിയ 38,188 വിദ്യാർഥികളിൽ 5264 പേർക്കാണ് പരീക്ഷയിൽ കാലിടറിയത്.