പാളയം പച്ചക്കറി മാർക്കറ്റ്​ ഇന്നുമുതൽ പ്രവർത്തിക്കും

കോഴിക്കോട്​: കോവിഡ്​ വ്യാപനത്തെ തുടർന്ന്​ അടച്ചുപൂട്ടിയ പാളയം പച്ചക്കറി മാർക്കറ്റ്​ ബുധനാഴ്​ച മുതൽ നിയന്ത്രണങ്ങളോടെ തുറന്നുപ്രവർത്തിക്കും. മാർക്കറ്റ്​ ചൊവ്വാഴ്​ച തുറക്കാൻ അനുമതി നൽകുകയും സബ്​ കലക്​ടർ ഇതുസംബന്ധിച്ച ഉത്തരവിറക്കുകയും ചെയ്​തിരുന്നുവെങ്കിലും പൊലീസിന്​ മതിയായ നിർദേശം നൽകിയിരുന്നില്ല.

തുടർന്ന്​ ചൊവ്വാഴ്​ച രാവിലെയോടെ വിവിധയിടങ്ങളിൽനിന്ന്​ മാർക്കറ്റിലേക്കെത്തിയ പച്ചക്കറി വണ്ടികളടക്കം റോഡിൽ തടഞ്ഞു. മാർക്കറ്റ്​ തുറക്കാനും അനുവദിച്ചില്ല. ഇതോടെ വീണ്ടും ആർ.ആർ.ടി, പൊലീസ്​, നഗരസഭ, കച്ചവടക്കാർ, ആരോഗ്യ പ്രവർത്തകർ എന്നിവരുടെ സംയുക്​ത യോഗം ചേർന്ന്​ ബുധനാഴ്​ച മുതൽ നിയന്ത്രണങ്ങളോടെ പ്രവർത്തിക്കാൻ തീരുമാനിക്കുകയായിരുന്നു. കഴിഞ്ഞ ദിവസങ്ങളിൽ മാർക്കറ്റ്​ പൂർണമായും അണുമുക്​തമാക്കുകയും ചെയ്​തു.

പച്ചക്കറിയുമായെത്തിയ ലോറികൾ പിന്നീട്​ ഉള്ളിലേക്ക്​ കടത്തിവിടുകയും ലോഡിറക്കുകയും ചെയ്​തു. കോവിഡ്​ നിയന്ത്രണങ്ങൾ പാലിച്ച്​​ കച്ചവടം നടത്തുമെന്ന്​ വ്യാപാരികൾ പറഞ്ഞു. മാർക്കറ്റിലേക്കുള്ള എട്ട്​ വഴികളിൽ നാലെണ്ണം ബാരിക്കേഡ്​ ഉപയോഗിച്ച്​ പൊലീസ്​ തടസ്സപ്പെടുത്തും. ശരീരോഷ്​മാവ്​ പരിശോധിച്ച ശേഷമേ മാർക്കറ്റിനുള്ളിലേക്ക്​ പ്രവേശിക്കാൻ അനുവദിക്കൂ. കോവിഡ്​ നെഗറ്റിവായ കച്ചവടക്കാർ, തൊഴിലാളികൾ, പോർട്ടർമാർ എന്നിവർക്ക്​ മാത്രമേ മാർക്കറ്റിൽ പ്രവേശനം അനുവദിക്കൂ. സ്​റ്റാൾ കച്ചവടം രാവിലെ 11 വ​െ​ര മാത്രമായി നിജപ്പെടുത്തും.

ഉന്തുവണ്ടി കച്ചവടക്കാർ 11 മണിക്കു ശേഷമേ പാളയത്ത്​ പ്രവേശിക്കാവൂ. ആളുകൾ കോവിഡ്​ നിയന്ത്രണങ്ങൾ ലംഘിച്ച്​ കൂട്ടംകൂടുന്നില്ലെന്ന്​ ആർ.ആർ.ടികൾ ഉറപ്പാക്കും.