p3 package കോവിഡ്​ ഭീതി; നാട്​ വീണ്ടും നിയന്ത്രണങ്ങളിലേക്ക്​

കോഴിക്കോട്​: ഇടവേളക്കുശേഷം കോവിഡ്​ വീണ്ടും വ്യാപകമായതോടെ നാടും നഗരവും നിയന്ത്രണങ്ങളിലേക്ക്​. സിറ്റി പൊലീസ്​ നഗരത്തിൽ വിവിധ നിയന്ത്രണങ്ങൾ ഏ​ർപ്പെടുത്തി. ആദ്യപടിയായി കോഴിക്കോട്​ കടപ്പുറത്തേക്കുള്ള ആളുകളു​ടെ പ്രവേശനം​ തടയുകയാണ്​​ ചെയ്യുന്നത്​. പൂർണമായും ആളുക​ളെ വിലക്കുകയല്ല, കുട്ടികളെയും പ്രായം ചെന്നവരെയും നിയന്ത്രിക്കുകയാണ്​ ചെയ്യുന്നതെന്ന്​ സ്​പെഷൽ ബ്രാഞ്ച്​ അസി. കമീഷണർ എ. ഉമേഷ്​ അറിയിച്ചു. കൂടുതൽ ആളുകളെത്തുമ്പോൾ ബീച്ചിലേക്കുള്ള ഗതാഗതം വരുംദിവസങ്ങളിൽ തടയും. ഇതിനായി കൂടുതൽ പൊലീസ്​ പ്രദേശത്ത്​ പരിശോധന നടത്തുന്നുണ്ട്​. നഗരത്തിൽ കൂടുതൽ ആളുകളെത്തുന്ന മൊഫ്യൂസിൽ, പാളയം, കെ.എസ്​.ആർ.ടി.സി ബസ്​ സ്റ്റാൻഡുകൾ, മാളുകൾ, വ്യാപാര സമുച്ചയങ്ങൾ എന്നിവിടങ്ങളിലും റെയിൽവേ സ്​റ്റേഷനിലും പരിശോധന ആരംഭിച്ചു. പൊതുപരിപാടികളിൽ ആളുക​ളെ നിയന്ത്രിക്കാൻ നിർദേശിച്ചിട്ടുണ്ട്​. മാസ്ക്​ ശരിയായ രീതിയിൽ ഉപയോഗിക്കാത്തവർ, സാമൂഹിക അകലം പാലിക്കാതെ അനാവശ്യമായി കൂട്ടംകൂടി നിൽക്കുന്നവർ എന്നിവർക്കെതിരെ നടപടി സ്വീകരിക്കാനും തീരുമാനിച്ചു. അതിനിടെ ഞായറാഴ്​ച നഗരത്തിന്‍റെ വിവിധ ഭാഗങ്ങളിലും കടപ്പുറത്തും പതിവുപോലെ വിലിയ തിരക്കാണ്​ അനുഭവപ്പെട്ടത്​. കോഴിക്കോടിന്​ പുറമെ മലപ്പുറം, വയനാട്​, കണ്ണൂർ ജില്ലകളിൽ നിന്നടക്കമുള്ളവർ അവധി ആഘോഷത്തിന്​ കടപ്പുറത്തേക്ക്​ എത്തുന്നതാണ്​ വലിയ ആൾക്കൂട്ടം സൃഷ്ടിച്ചത്​. ​ ജില്ലയിലെ പ്രാദേശിക ബസ്​ സ്റ്റാൻഡുകളിലും അങ്ങാടികളിലുമടക്കം ആളുകൾ കൂട്ടംകൂടുന്നത്​ ഒഴിവാക്കാനുള്ള നടപടി ആരംഭിച്ചു. സർക്കാർ ഓഫിസുകളിലും സ്വകാര്യ സ്ഥാപനങ്ങളിലുമടക്കം കോവിഡ്​ സുരക്ഷാസംവിധാനങ്ങൾ ശക്​തമാക്കാൻ നിർദേശം നൽകിയിട്ടുണ്ട്​. മുഴുവൻ കോടതി നടപടികളും ഓൺലൈനാക്കി. വെള്ളിയാഴ്ച മുതൽ സ്കൂളുകളിലെ ഒമ്പതാം ക്ലാസ്​ വരെ അടച്ചിടാനും തീരുമാനിച്ചിട്ടുണ്ട്​. ഉന്നത വിദ്യാഭ്യാസ സ്ഥാപനങ്ങളായ ഐ.ഐ.എം, എൻ.ഐ.ടി എന്നിവിടങ്ങളിലടക്കം കൂടുതൽ പേർക്ക്​ രോഗം സ്​ഥിരീകരിച്ചതിനാൽ​ കടുത്ത നിയന്ത്രണങ്ങൾ ഏർപ്പെടുത്തി​. പൊതുപരിപാടികൾക്കും അടുത്ത ദിവസങ്ങളിൽ ജില്ല ഭരണകൂടം നിയന്ത്രണം ഏർപ്പെടുത്തുമെന്നാണ്​ വിവരം. നേരത്തെ രോഗലക്ഷണങ്ങളുള്ളവർ മുഴുവൻ പരിശോധനക്ക്​ വിധേയരാവുകയും പോസിറ്റിവായാലുടൻ ക്വാറന്‍റീനിൽ കഴിയുകയും ചെയ്തിരുന്നു​വെങ്കിൽ ഇപ്പോൾ പരിശോധനക്ക്​ വിമുഖത കാട്ടുന്നതാണ്​ രോഗവ്യാപനത്തിനിടയാക്കുന്നതെന്നാണ്​ ആരോഗ്യവകുപ്പ്​ അധികൃതർ പറയുന്നത്​. രോഗവിവരക്കണക്ക്​ ആരോഗ്യവകുപ്പ്​ പുറത്തുവിടുന്നത്​ നിർത്തിയതിനെതിരെ വിമർശനമുയർന്നിട്ടുണ്ട്​. ആളുകളുടെ ജാഗ്രത കുറയാൻ ഇതും കാരണമായതായാണ്​ ആ​ക്ഷേപം. -സ്വന്തം ലേഖകൻ inner box.... രോഗസ്ഥിരീകരണ നിരക്ക്​ കുതിക്കുന്നു കോവിഡ്​ ബാധിതർ പതിനായിരം കടന്നു; ടിപി.ആർ 30.65 ശതമാനം --1643 പുതിയ രോഗികൾ, ഇതുവരെ 4543 മരണം കോഴിക്കോട്​: ജില്ലയിലെ കോവിഡ്​ ബാധിതരുടെ എണ്ണം വീണ്ടും പതിനായിരം കടന്നു. ജനുവരി ആദ്യം 2758 രോഗികൾ മാത്രമേ ഉണ്ടായിരുന്നുള്ളൂ​. രോഗസ്ഥിരീകരണ നിരക്കും (ടി.പി.ആർ) കുതിച്ചുയർന്നു. ഏഴിൽ താഴെ എത്തിയതാണ്​​ ദിവസങ്ങൾക്കുള്ളിൽ ഉയർന്ന്​ 30.65 ശതമാനത്തിലെത്തിയത്​. പ്രതിദിന രോഗികളുടെ എണ്ണവും നേരത്തെ മുന്നൂറിൽ താഴെവരെയെത്തിയത്​ ഇപ്പോൾ ആയിരത്തഞ്ഞൂറിന്​ മുകളിലെത്തി. അതിനി​ടെ ഒമിക്രോണും ജില്ലയിൽ വലിയതോതിൽ കൂടി. ഐ.ഐ.എമ്മിലെ വിദ്യാർഥിക്കടക്കം ഒമിക്രോൺ സ്ഥിരീകരിച്ചു. ഞായറാഴ്ച ജില്ലയില്‍ 1643 പേർ കൂടി കോവിഡ് പോസിറ്റിവായതായി ജില്ല മെഡിക്കല്‍ ഓഫിസര്‍ ഡോ. വി. ഉമർഫാറൂഖ്​ അറിയിച്ചു. സമ്പര്‍ക്കം വഴി 1616 പേർക്കും ഉറവിടം വ്യക്തമല്ലാത്ത 11 പേർക്കും സംസ്ഥാനത്തിന് പുറത്തുനിന്നെത്തിയ 11 പേർക്കും അഞ്ച്​ ആരോഗ്യപ്രവർത്തകർക്കുമാണ് രോഗം സ്ഥിരീകരിച്ചത്. 5500 പേരെയാണ്​ പരിശോധനക്ക് വിധേയമാക്കിയത്​. കോവിഡ് ആശുപത്രികള്‍, എഫ്.എല്‍.ടി.സികള്‍, വീടുകള്‍ എന്നിവിടങ്ങളില്‍ ചികിത്സയിലായിരുന്ന 415 പേര്‍ കൂടി രോഗമുക്തി നേടി. നിലവിൽ രോഗം സ്ഥിരീകരിച്ച് 10,529 പേരാണ് ചികിത്സയിലുള്ളത്. ഇതിൽ 104 പേർ സര്‍ക്കാര്‍ ആശുപത്രികളിലും 252 പേർ സ്വകാര്യ ആശുപത്രികളിലും മൂന്നുപേർ ഫസ്റ്റ് ലൈന്‍ ട്രീറ്റ്മെന്‍റ്​ സെന്‍ററുകളിലും 50 പേർ സെക്കൻഡ്​​ ലൈന്‍ ട്രീറ്റ്മെന്‍റ്​ സെന്‍ററുകളിലും 8477 പേർ വീടുകളിലുമാണ്​ ചികിത്സയിലുള്ളത്​. പുതുതായി വന്ന 1782 പേർ ഉൾപ്പെടെ 22,874 പേർ ഇപ്പോൾ നിരീക്ഷണത്തിലുണ്ട്. 4543 മരണങ്ങളാണ് ഇതുവരെ കോവിഡ് മൂലമെന്ന് ഔദ്യോഗികമായി റിപ്പോർട്ട് ചെയ്യപ്പെട്ടത്. സംസ്ഥാനത്ത്​ തിരുവനന്തപുരവും എറണാകുളവും തൃശൂരും കഴിഞ്ഞാൽ ഞായറാഴ്ച ഏറ്റവും കൂടുതൽ രോഗം സ്ഥിരീകരിച്ചത്​ കോഴിക്കോട്ടാണ്​.