സദനഅസ

ഐ.ഐ.എം.കെ യിൽ ബിസിനസ്​ ലീഡർഷിപ്​ വിദ്യാർഥികൾക്ക്​ മികച്ച ജോലി വാഗ്ദാനം കോഴിക്കോട്​: ഇന്ത്യൻ ഇൻസ്​റ്റിറ്റ്യൂട്ട്​ ഓഫ്​ മാനേജ്​മെന്‍റ്​ കോഴിക്കോടി​ലെ (ഐ.ഐ.എം.കെ) ഒരു വർഷ റസിഡൻഷ്യൽ എം.ബി.എ കോഴ്​സായ പി.ജി പ്രോഗ്രാം ഇൻ ബിസിനസ്​ ലീഡർഷിപ്​ (പി.ജി.പി-ബി.എൽ) പൂർത്തിയാക്കിയവർക്കെല്ലാം മികച്ച ശമ്പളത്തോടെ ജോലി. കഴിഞ്ഞ വർഷത്തേക്കാൾ ശമ്പളത്തിൽ ശരാശരി 20 ശതമാനം വർധനവുണ്ടായി. 29 ലക്ഷം രൂപയാണ്​ ശരാശരി വാർഷിക ശമ്പളം. 53 വിദ്യാർഥികളെ തേടി 52 കമ്പനികൾ റിക്രൂട്ട്​മെന്‍റിനെത്തി. 69.3 ലക്ഷം രൂപയാണ്​ ഒരാൾക്ക്​ കിട്ടിയ ഉയർന്ന ശമ്പളം. വിദ്യാർഥിനികൾക്ക്​ 30.41 ലക്ഷമാണ്​ ശരാശരി വാർഷിക ശമ്പളം. 42 ​ശതമാനം പേർക്കും കൺസൾട്ടിങ്​ മേഖലയിലാണ്​ ജോലി കിട്ടിയത്​. ജനറൽ മാനേജ്​മെന്‍റ്​ ജോലികൾക്ക്​ 25ഉം ​ഐ.ടി വിശകലന മേഖലയിലേക്ക്​ 22 ശതമാനവും ഉദ്യോഗാർഥികളെ തെരഞ്ഞെടുത്തു. ആമസോൺ മുതൽ റിലയൻസ്​ റീ​ട്ടെയിൽ വരെയുള്ള കമ്പനികൾ റിക്രൂട്ട്​മെന്‍റിനെത്തി. പി.ജി.പി-ബി.എൽ കോഴ്​സിന്‍റെ രണ്ടാം ബാച്ചാണ്​ പുറത്തിറക്കിയത്​. തൊഴിൽമേഖലയിൽ മായാത്ത മുദ്ര പതിപ്പിക്കാൻ ഈ വിദ്യാർഥികൾക്ക്​ കഴിയുമെന്ന്​ ഐ.ഐ.എം.കെ ഡയറക്ടർ പ്രഫ. ദേബാഷിശ്​ ചാറ്റർജി പറഞ്ഞു.