പലിശ രഹിത മൈക്രോ ഫിനാൻസ്​ ദേശീയ സെമിനാർ 19 മുതൽ

കോഴിക്കോട്: ഇൻഫാക് സസ്​റ്റെയിനബിൾ ഡവലപ്മെൻറ് സൊസൈറ്റി കേരളയും വാഴയൂർ സാഫി ഇൻസ്​റ്റിറ്റ്യൂട്ടും സംയുകതമായി സംഘടിപ്പിക്കുന്ന പലിശരഹിത മൈക്രോ ഫിനാൻസ്​ ദേശീയ സെമിനാർ ഒക്ടോബർ 19, 20 തീയതികളിൽ വാഴയൂർ സാഫി കാമ്പസിൽ നടക്കും. ‘പലിശരഹിത മൈേക്രാ ഫിനാൻസും സുസ്​ഥിര വികസനവും’ എന്ന തലക്കെട്ടിൽ സംഘടിപ്പിക്കുന്ന സെമിനാർ പ്രമുഖ മൈക്രോ ഫിനാൻസ്​ വിദഗ്ധനും ന്യൂഡൽഹി രാജീവ്ഗാന്ധി ഫൗണ്ടേണ്ടഷൻ സി.ഇ.ഒയുമായ വിജയ് മഹാജൻ ഉദ്ഘാടനം ചെയ്യും.

രാജ്യത്തിന്‍റെ വിവിധ ഭാഗങ്ങളിൽ നിന്നുള്ള മൈക്രോ ഫിനാൻസ്​ സ്​ഥാപനങ്ങൾ, എൻ.ജി.ഒകൾ, ഗവേഷകർ, വിദ്യാർഥികൾ തുടങ്ങിയവർ പങ്കെടുക്കുമെന്ന്​ ഭാരവാഹികൾ പറഞ്ഞു.

കോ ഒാപറേറ്റീവ് മേഖലയിലും എൻ.ജി.ഒ മേഖലയിലും പ്രവർത്തിക്കുന്ന മൈേക്രാഫിനാൻസ്​ സംവിധാനങ്ങളുടെ പ്രവർത്തനങ്ങൾ അക്കാദമിക തലത്തിലേക്ക് ഉയർത്തിക്കൊണ്ടുവരുന്നതിനും വിവിധ മാതൃകകൾ രാജ്യത്തിന് പരിചയപ്പെടുത്തുന്നതിനുമാണ് സെമിനാർ സംഘടിപ്പിക്കുന്നത്​.

19 ന് രാവിലെ 9.30 ന് നടക്കുന്ന ഉദ്ഘാടന സെഷനിൽ ഇ.ടി മുഹമ്മദ് ബഷീർ എം.പി, പി. മുജീബ് റാൻ, പാണക്കാട് മുനവ്വറലി ശിഹാബ് തങ്ങൾ, ടി. സിദ്ദീഖ് എം.എൽ. എ, ഒ.അബ്​ദുറഹ്​മാൻ, എച്ച്. അബ്​ദുറഖീബ് (ചെന്നൈ) തുടങ്ങിയവർ പങ്കെടുക്കും. സുരേഷ് കൃഷ്ണ (ബാംഗ്ലൂർ), പ്രണയ് ഭാർഗവ (ഹൈദരാബാദ്), ഡോ. ഷാരീഖ് നിസാർ (മുംബൈ), ഡോ. എ.എ ഫൈസി (ബിഹാർ), ഡോ. ഇർഷാദ് (മുംബൈ), ഡോ. കെ. ജാഫർ (മദ്രാസ്​ ഇൻസ്​റ്റിറ്റ്യൂട്ട് ഫോർ ഡെവലപ്മെൻറ് സ്​റ്റഡീസ്​), ഉസാമ ഖാൻ (ന്യൂഡൽഹി), ഇഖ്ബാൽ ഹുസൈൻ (ഹൈദരാബാദ്) തുടങ്ങിയവർ വിവിധ വിഷയങ്ങളിൽ സംവദിക്കും.

20ന് വൈകുന്നേരം മൂന്നിന്​ സമാപന സമ്മേളനം നടക്കും. വാർത്തസമ്മേളനത്തിൽ സാഫി ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് സി.ഇ.ഒ​ ​പ്രഫ. ഇമ്പിച്ചിക്കോയ, ഇൻഫാക് ചെയർമാൻ ഡോ. മുഹമ്മദ് പാലത്ത്, സെമിനാർ കോഓഡിനേറ്റർ ഡോ. ഷബീബ് ഖാൻ, ഇൻഫാക് വൈസ്​ ചെയർമാൻ ടി. കെ. ഹുസൈൻ, ജന. സെക്രട്ടറി സി.പി. ഹബീബ് റഹ്മാൻ എന്നിവർ പ​ങ്കെടുത്തു.