തളി റോഡിൽ യാത്രക്കാരെ കാത്തിരിക്കുന്നത് ചതിക്കുഴി; പരിഹാരം കാണാതെ അധികൃതർ

നന്മണ്ട: മഴ പെയ്താൽ തളി റോഡിൽ യാത്രക്കാരെ കാത്തിരിക്കുന്നത് അപകടം. തളി പടിഞ്ഞാറെ നട റോഡിലാണ് ഈ അപകടക്കെണി. ഇവിടെ വാഹനങ്ങളുടെ വേഗം കുറക്കാൻ ഒരു വരമ്പ് സ്ഥാപിച്ചിരുന്നു.

എന്നാൽ, വരമ്പ് ഇറങ്ങുന്ന വാഹനങ്ങൾ വന്നുവീഴുന്നതാവട്ടെ ഇവിടെ രൂപംകൊണ്ട ഗർത്തത്തിലേക്കാണ്. പരിചിതരായ യാത്രക്കാർപോലും തെന്നിവീഴുന്ന ഇവിടെ അപരിചിതരായ യാത്രക്കാരുടെ അവസ്ഥ പരിതാപകരമാണ്. ഇരുചക്രവാഹനക്കാരാണ് ഇവിടെ സ്ഥിരമായി അപകടത്തിൽപെടുന്നത്. മഴവെള്ളം തളംകെട്ടി നിൽക്കുമ്പോഴാണ് ഗർത്തമെവിടെയാണെന്ന് അറിയാതെ പോകുന്നത്. ഒട്ടേറെ യാത്രക്കാർ ആശ്രയിക്കുന്ന റോഡാണിത്. ടൗണിലെ ഗതാഗതക്കുരുക്കിന് ഒരു പരിഹാരമെന്നോണമായിരുന്നു തളി ബൈപാസ് പണിതത്. എന്നാൽ, കുറുക്കുവഴി തേടുന്ന യാത്രക്കാരെ ഈ റോഡിൽ കാത്തിരിക്കുന്നതാവട്ടെ ചതിക്കുഴിയും.