മയ്യഴി പുഴയിൽ ജലനിരപ്പ്‌ ഉയർന്നു; മലയോരം ജാഗ്രതയിൽ

നാദാപുരം: തുടർച്ചയായി പെയ്യുന്ന കനത്ത മഴയിൽ മയ്യഴി പുഴയിൽ ജലനിരപ്പ് ഉയർന്നു. വിലങ്ങാട് ഉൾപ്പെടെയുള്ള മലയോര മേഖലയിലെ ജാഗ്രത പാലിക്കുകയാണ്. ഏത് അടിയന്തര സാഹചര്യവും നേരിടാൻ നാട്ടുകാർ സജ്ജരായിരിക്കുകയാണ്. വിഷ്ണുമംഗലം ബണ്ട് കവിഞ്ഞൊഴുകി തുടങ്ങി.

1.4 കോടി രൂപ ചെലവിൽ നവീകരണം പൂർത്തീകരിച്ചതിനാൽ പുഴയിൽ ആഴം വർധിച്ചിട്ടുണ്ട്. നാദാപുരം മേഖലയിലെ മലയോര പ്രദേശങ്ങളിലും കനത്ത മഴയാണ് പെയ്യുന്നത്. താഴ്ന്ന പ്രദേശങ്ങളിൽ വെള്ളം കയറി.

കല്ലാച്ചി, ഇരിങ്ങണ്ണൂർ ടൗണുകളിലെ സംസ്ഥാന പാതയിൽ വെള്ളക്കെട്ടുകൾ രൂപപ്പെട്ടു. ചേലക്കാട്, പാറയിൽ പുളിക്കൂൽ തോട്ടിലും, വേങ്ങോളി, കളിയാംവെള്ളി, മാഹി കനാലിലും ജലനിരപ്പ് ഉയർന്നിട്ടുണ്ട്. പലയിടങ്ങളിലെയും വീട്ടുപറമ്പിലെ മരങ്ങൾ കടപുഴകി.