വാഴത്തോട്ടത്തിലിറങ്ങിയ കാട്ടുപന്നിയെ വെടിവെച്ചു കൊന്നു

മുക്കം: മണാശ്ശേരിയിലെ വാഴത്തോട്ടത്തിൽ പട്ടാപ്പകൽ 456 വാഴകൾ നശിപ്പിച്ച കാട്ടുപന്നികളിൽ ഒന്നിനെ വെടിവെച്ചുകൊന്നു. നെല്ലിക്കുന്ന് മലയിൽ മുക്കം ഓർഫനേജി​െൻറ ഉടമസ്ഥതയിലുള്ള തരിശ് ഭൂമിയിൽ മുക്കം നഗരസഭയുടെയും കൃഷിഭവ​െൻറയും സഹകരണത്തോടെ മുതിർന്ന കർഷകൻ അടുക്കത്തിൽ മുഹമ്മദ്​ഹാജി കൃഷിചെയ്​ത വാഴകളാണ് പന്നികൾ കഴിഞ്ഞ ദിവസം നശിപ്പിച്ചത്.

വനം വകുപ്പ് മുക്കം നഗരസഭക്ക് നൽകിയ അനുമതി പ്രകാരമാണ് നഗരസഭ ചുമതലപ്പെടുത്തിയ കച്ചേരി സ്വദേശി സി.എം. ബാലൻ കാട്ടുപന്നിയെ വെടിവെച്ച് വീഴ്ത്തിയത്. കാട്ടുപന്നികൾ ഇറങ്ങിയതായി വിവരമറിയിച്ചതിനെത്തുടർന്നാണ്​ ബാലൻ സ്​ഥലത്തെത്തിയത്​. ഒന്നിച്ചുണ്ടായിരുന്ന പന്നികൾ കാട്ടിലേക്ക് ഓടി മറഞ്ഞു.

എട്ടര ഏക്കറോളം വരുന്ന തരിശ് ഭൂമി പാട്ടത്തിനെടുത്ത് മുഹമ്മദ്​ ഹാജി ഇവിടെ വിപുലമായി കൃഷി നടത്തിയിരുന്നു. മത്തൻ, വെള്ളരി, കക്കിരി തുടങ്ങിവ പൂർണമായും പന്നികൾ നശിപ്പിച്ചു. നഗരസഭാധികൃതരും കൃഷി വകുപ്പ് ഉദ്യോഗസ്ഥരും വനംവകുപ്പ് ഉദ്യോഗസ്ഥരും സ്ഥലത്തെത്തി പന്നിയുടെ ജഡം ഇൻക്വസ്​റ്റ്​ നടപടികൾ പൂർത്തീകരിച്ച്​ കുഴിച്ചുമൂടി.