കൈ പൊള്ളിക്കും പച്ചക്കറി വില

കോഴിക്കോട്​: കോവിഡ്​കാലത്ത്​ പച്ചക്കറി വില കുതിച്ചുയരുന്നത്​ ജനജീവിതം ദുരിതത്തിലാക്കുന്നു. കിലോഗ്രാമിന്​ 40 രൂപയിൽ കുറഞ്ഞ പച്ചക്കറികളൊന്നും കിട്ടാത്ത അവസ്​ഥയാണ്​. ഓണത്തിനു​ശേഷം മിക്ക പച്ചക്കറികൾക്കും കടിഞ്ഞാണില്ലാതെ വില ഉയരുകയാണ്​. ചില്ലറ വിപണിയിൽ ഒരു നിയന്ത്രണവുമില്ലാതെ കച്ചവടക്കാർ വില വർധിപ്പിക്കുന്നതായും ആക്ഷേപമുണ്ട്​്​.

തക്കാളി, ഉള്ളി, വെണ്ട, ഉരുളക്കിഴങ്ങ്​, കാരറ്റ്​, മുരിങ്ങക്കായ, പച്ചക്കായ എന്നിവക്കെല്ലാം പൊള്ളുന്ന വിലയാണ്​. ലോക്​ഡൗൺ കാലത്ത്​ വിപണിയിൽ സജീവമായി ഇടപെട്ട സിവിൽ സപ്ലൈസ്​ ഉദ്യോഗസ്​ഥരും ജില്ല ഭരണകൂടവും കാഴ്​ചക്കാരായതോടെ വിലക്കയറ്റം തടയാൻ സംവിധാനമില്ലാതായി. വിലവിവരപ്പട്ടിക പ്രദർശിപ്പിക്കണമെന്ന നിർദേശം പല കടകളും പാലിക്കുന്നില്ല. വാങ്ങ​ുന്ന വിലയും വിൽക്കുന്ന വിലയും തമ്മിൽ വലിയ വ്യത്യാസമുണ്ടെങ്കിൽ തടയാനും നേരത്തേ അധികൃതർ ശ്രമിച്ചിരുന്നു.

27 മുതൽ 30 രൂപവരെയാണ്​ കോഴിക്കോട്ട്​ മൊത്ത വിപണിയിൽ ഒരു കിലോ തക്കാളിയുടെ വില. ജില്ലയുടെ വിവിധയിടങ്ങളിൽ 45രൂപ വരെയാണ്​ ചില്ലറ വില. കർണാടകയിലും തമിഴ്​നാട്ടിലും മഴയിൽ തക്കാളി നശിച്ചതിനാൽ വിളവെടുപ്പ്​ കുറഞ്ഞതാണ്​ വിലക്കയറ്റത്തിന്​ കാരണമെന്ന്​ മൊത്തക്കച്ചവടക്കാർ പറയുന്നു. മഴ നനഞ്ഞ തക്കാളി പെ​ട്ടെന്ന്​ നശിക്കുന്നുമുണ്ട്​. ഒരു പെട്ടി തക്കാളി വാങ്ങിയാൽ രണ്ടു​ കിലോ വരെ കേടാകുന്നതിനാലാണ്​ ചെറുവിപണിയിൽ വില കൂടാൻ കാരണമെന്നും ഇവർ പറയുന്നു.

വെണ്ടക്ക്​ 45 രൂപ വരെയാണ്​ മൊത്തവില. ചില്ലറ വിൽപനക്കാർ 70 രൂപവരെ വാങ്ങുന്നുണ്ട്​. ഉള്ളിക്ക്​ 45 രൂപയിലേറെ വേണം. പുണെയിൽനിന്ന്​ വരുന്ന, എളുപ്പം കേടാകാത്ത 'ഡ്രൈ ഉള്ളി' ആണ്​ ജില്ലയിലെത്തുന്നത്​. കാരറ്റിന്​ 75 രൂപയാണ്​ മൊത്തവില. ഉരുളക്കിഴങ്ങിനും മുരിങ്ങക്കായക്കും വില കൂടുതലാണ്​. പച്ചക്കായ കിട്ടാൻ 50 രൂപ നൽകണം. സംസ്​ഥാന സർക്കാർ സംരംഭമായ ഹോർട്ടികോർപിൽ അൽപം വിലക്കുറവുണ്ടെങ്കിലും ഉപഭോക്​താക്കൾക്ക്​ കൈത്താങ്ങാകാൻ ഈ സംവിധാനത്തിനും കഴിയുന്നില്ല.