മത്സ്യത്തൊഴിലാളികളോട്​ സർക്കാർ കാണിക്കുന്നത്​ ക്രൂരത -ഷാഫി ചാലിയം

കോഴിക്കോട്: മത്സ്യത്തൊഴിലാളികളുടെ കുട്ടികൾക്ക്​ നൽകുന്ന വിദ്യാഭ്യാസ സ്​കോളർഷിപ്പ്​ തടഞ്ഞുവെച്ചത്​ ക്രൂരതയാണെന്ന്​ മുസ്​ലിം ലീഗ്​ സംസ്​ഥാന സെക്രട്ടറി ഷാഫി ചാലിയം. കടലുണ്ടിയിൽ യു.ഡി.എഫ്​ കുടുംബ സംഗമം ഉദ്​ഘാടനം ചെയ്യുകയായിരുന്നു അദ്ദേഹം. ഉപ മുഖ്യമന്ത്രിയായിരുന്ന അവുകാദർ കുട്ടി നഹ ഫിഷറീസ് വകുപ്പ് മന്ത്രിയായിരിക്കുമ്പോഴാണ് പട്ടിക ജാതി വിദ്യാർഥികൾക്ക് മാത്രമുണ്ടായിരുന്ന പഠന സ്കോളർഷിപ്പ് മുഴുവൻ മത്സ്യത്തൊഴിലാളി വിദ്യാർഥികൾക്കും ബാധകമാക്കി ഉത്തവിറക്കിയത്.

പിന്നീട്​ 2014 ലെ സമഗ്ര പരിഷ്കരണ ഉത്തരവിലൂടെ മെഡിക്കൽ, എൻജിനീയറിങ്​ തുടങ്ങിയ ഉന്നത വിദ്യാഭ്യാസ മേഖലകളിലും മത്സ്യത്തൊഴിലാളി വിദ്യാർഥികൾക്കും എസ്​.ഇ ആനുകൂല്യങ്ങൾ നൽകി. പ്രവേശന പരീക്ഷക്ക്​ യോഗ്യത നേടിയ മത്സ്യത്തൊഴിലാളി വിദ്യാർഥിക്ക് 1,10,000 രൂപ വരെ നൽകി. എന്നാൽ, ഇടത് ഭരണം അതൊക്കെ അവതാളത്തിലാക്കിയിരിക്കയാണെന്ന്​ ഷാഫി കുറ്റപ്പെടുത്തി.

സ്കോളർഷിപ്പ് തുക 23 കോടി രൂപയോളം സർക്കാർ പിടിച്ചു വെച്ചിരിക്കയാണ്​. ഇതുമൂലം മത്സ്യത്തൊഴിലാളി വിദ്യാർഥികൾ ഫീസ് കൊടുക്കാൻ കഴിയാതെ വലയുകയാണ്​. കോഴിക്കോട് ജില്ലയിൽ മാത്രം പാവപ്പെട്ട മത്സ്യത്തൊഴിലാളി വിദ്യാർഥികളുടെ 3.20 കോടി രൂപയാണ് പിടിച്ചു വെച്ചിരിക്കുന്നത്. മലപ്പുറം ജില്ലയിലാവട്ടെ കഴിഞ്ഞ സെപ്റ്റംബർ വരെ ഒന്നര കോടിയാണ് കുടിശ്ശിക.

സ്കോളർഷിപ്പ് തുക നിഷേധിക്കുക വഴി സംസ്ഥാനത്താകെ 22,000ഓളം കുട്ടികളാണ്​ ദുരിതം അനുഭവിക്കുന്നത്​. തീരദേശ മേഖലയോട് ഇടത് സർക്കാർ കാണിക്കുന്ന അവഗണനക്കും വിവേചനത്തിനുമെതിരെ മത്സ്യത്തൊഴിലാളികളുടെ വോട്ടവകാശം വിനിയോഗിക്കണമെന്നും ഷാഫി ചാലിയം അഭ്യർഥിച്ചു.