എളമരം കരീം കുറ്റപ്പെടുത്തിയ 'വിദ്യാഭ്യാസ റിക്രൂട്ടിങ്​​ കേന്ദ്ര'ത്തിൽ സി.പി.എം ഏരിയ സമ്മേളനം; കരീമിനെ പാർട്ടി തള്ളിയെന്ന്​​ വിലയിരുത്തൽ

കോഴിക്കോട്: ഡൽഹി ഉൾപ്പെടെ സർവകലാശാലകളിൽ പഠിക്കുന്ന മലയാളി വിദ്യാർഥികളുടെ 'റി​ക്രൂട്ടിങ്​​ കേന്ദ്രം' എന്ന്​ സി.പി.എം കേ​ന്ദ്ര കമ്മിറ്റി അംഗം എളമരം കരീം കുറ്റപ്പെടുത്തിയ ചേവായൂരിലെ 'സിജി'യിൽ സി.പി.എം ടൗണ്‍ ഏരിയ സമ്മേളനം.

ജമാഅത്തെ ഇസ്​ലാമി മത തീവ്രവാദം വളർത്താൻ പ്രത്യേക കേഡർമാരെ തിരഞ്ഞെടുക്കാൻവേണ്ടി നടത്തുന്ന സ്​ഥാപനമെന്നായിരുന്നു സിജിയെ എളമരം കരീം എം.പി വിശേഷിപ്പിച്ചിരുന്നത്​.

നാദാപുരം മേഖലയിൽ നിന്നുൾപ്പെടെ വിദ്യാർഥികളെ ഡൽഹിയിലെ സർവകലാശാലകളിലേക്ക്​ റിക്രൂട്ട്​ ചെയ്യുന്നു. സുന്നി വിഭാഗത്തിൽപെട്ട കുട്ടികൾ പോലും ഇതിൽപെടുന്നു എന്നെല്ലാമായിരുന്നു വിമർശനം.

ജമാഅത്തെ ഇസ്​ലാമിയുടെ പ്രച്ഛന്നവേഷം കെട്ടിയ കരിയര്‍ റിക്രൂട്ട്മെൻറ്​ സ്ഥാപനമാണ് 'സിജി' എന്നായിരുന്നു കരീമി​‍െൻറ പരാമർശം. കഴിഞ്ഞ ഫെബ്രുവരിയിൽ കോഴിക്കോട്​ എൻ.ജി.ഒ യൂനിയൻ ഹാളിൽ നടന്ന പരിപാടിയിലെ കരീമി​െൻറ പ്രസംഗം വലിയ ചർച്ചയായി.

ഒടുവിൽ കരീം ഉൾപ്പെടുന്ന സി.പി.എം ടൗണ്‍ ഏരിയ സമ്മേളനമാണ് ഇതേ 'റിക്രൂട്ടിങ്​​ കേന്ദ്ര'ത്തിൽ ആരംഭിച്ചത്​. ഇത്​ സമൂഹ മാധ്യമങ്ങളിൽ വലിയ ചർച്ചയായി​.

സംഘ്​പരിവാർ​ പോലും ഉന്നയിക്കാത്ത ആരോപണം നടത്തിയ കരീമി​‍െൻറ അഭിപ്രായത്തെ പാർട്ടി തള്ളിയെന്നാണ്​ വിലയിരുത്തൽ. ഏരിയ സമ്മേളനത്തി​‍െൻറ ഭാഗമായി സിജി കരിയര്‍ സെൻററിനു മുന്നില്‍ പാര്‍ട്ടി പതാകകളും രക്തസാക്ഷി മണ്ഡപവും സജ്ജീകരിച്ചിട്ടുണ്ട്​. സി.പി.എം ജില്ല സെക്രട്ടറി പി. മോഹനന്‍ ഉള്‍പ്പെടെ നേതാക്കള്‍ രക്തസാക്ഷി മണ്ഡപത്തില്‍ പുഷ്പാര്‍ച്ചന നടത്തി.