ബാലുശ്ശേരിയിൽ ഇറച്ചിക്കട ജീവനക്കാരന് കോവിഡ്; മാർക്കറ്റ് അടച്ചു, സമ്പർക്ക പട്ടിക വിപുലം

ബാലുശ്ശേരി: ബാലുശ്ശേരി മാർക്കറ്റിലെ ബീഫ് സ്​റ്റാളിലെ ജീവനക്കാരന് കോവിഡ് പോസിറ്റിവ് സ്ഥിരീകരിച്ചതിനെ തുടർന്ന് നിരവധി പേർ നിരീക്ഷണത്തിൽ പ്രവേശിച്ചു. സംഭവത്തെ തുടർന്ന്​ ബാലുശ്ശേരി മാർക്കറ്റ് അടച്ചു.

കാക്കൂർ സ്വദേശിയായ ജീവനക്കാരന് കഴിഞ്ഞദിവസം നടന്ന പരിശോധനയിലാണ് കോവിഡ് പോസിറ്റിവായത്. എന്നാൽ ഇയാളുടെ ഉറവിടം വ്യക്തമല്ല. തിരുവോണത്തിനു തൊട്ടുമുമ്പു വരെ ഇയാൾ കടയിലെത്തിയിരുന്നതായി ആരോഗ്യവകുപ്പിനു വിവരം ലഭിച്ചിട്ടുണ്ട്.

ഇതേത്തുടർന്ന് കഴിഞ്ഞ ആഗസ്​റ്റ്​ 20 മുതൽ ബാലുശ്ശേരി മാർക്കറ്റിൽ ബീഫ് സ്​റ്റാളുകളിൽ സമ്പർക്കം പുലർത്തിയ മുഴുവൻ പേരും സ്വയം നിരീക്ഷണത്തിൽ പ്രവേശിക്കണമെന്നും അതത് പ്രദേശത്തെ ആരോഗ്യ പ്രവർത്തകരെയോ ആർ.ആർ.ടി പ്രവർത്തകരെയോ വിവരമറിയിക്കണമെന്നും ജെ.എച്ച്.ഐ ഷാജീബ് കുമാർ അറിയിച്ചു. ബാലുശ്ശേരി പഞ്ചായത്തിലെ 4, 12 വാർഡുകളെ കണ്ടെയ്ൻമെൻറ്​ സോണിൽ നിന്നും ഒഴിവാക്കിയിട്ടുണ്ട്.