മെ​ഡി​ക്ക​ൽ കോ​ള​ജി​ൽ അ​ന​സ്തെ​റ്റി​സ്റ്റു​ക​ൾ കു​റ​വ്; അ​ത്യാ​ഹി​ത വി​ഭാ​ഗ​ത്തി​ൽ രാ​ത്രി ശസ്ത്രക്രിയ​യി​ല്ല

കോ​ഴി​ക്കോ​ട്: മ​ല​ബാ​റി​ലെ സാ​ധാ​ര​ണ​ക്കാ​രു​ടെ ഏ​ക ആ​ശ്ര​യ​മാ​യ കോ​ഴി​ക്കോ​ട് മെ​ഡി​ക്ക​ൽ കോ​ള​ജി​ൽ അ​ന​സ്തേ​ഷ്യ ഡോ​ക്ട​ർ​മാ​രു​ടെ കു​റ​വു​കാ​ര​ണം ശസ്ത്രക്രിയ മു​ട​ങ്ങു​ന്നു. അ​ത്യാ​ഹി​ത വി​ഭാ​ഗ​ത്തി​ൽ രാ​ത്രി​ വലിയ ശ​സ്ത്ര​ക്രി​യ​ക​ൾ നി​ർ​ത്തി​വെ​ച്ചി​രി​ക്ക​യാ​ണ്. രാ​ത്രി​യി​ൽ അ​ന​സ്തേ​ഷ്യ ഡോ​ക്ട​റു​ടെ സേ​വ​നം ല​ഭി​ക്കാ​ത്ത​തി​നാ​ലാ​ണ് എ​ല്ലു​രോ​ഗ വി​ഭാ​ഗ​ത്തി​ല​ട​ക്കം ശസ്ത്രക്രിയ മു​ട​ങ്ങു​ന്ന​ത്. നേ​ര​ത്തേ, അ​ത്യാ​ഹി​ത വി​ഭാ​ഗ​ത്തി​ലേ​ക്ക് രാ​ത്രി​യി​ലും ഇവരുടെ സേ​വ​നം ല​ഭി​ച്ചി​രു​ന്നു. എ​ന്നാ​ൽ, ഡോ​ക്ട​ർ​മാ​രു​ടെ കു​റ​വ് കാ​ര​ണം ഈ ​മാ​സം ഒ​ന്നു​മു​ത​ൽ രാ​ത്രി സേ​വ​നം ല​ഭി​ക്കു​ന്നി​ല്ല.

ഇ​ത് വാ​ഹ​നാ​പ​ക​ട​ത്തി​ലും മ​റ്റും പ​രി​ക്കേ​റ്റെ​ത്തു​ന്ന രോ​ഗി​ക​ളെ പ്ര​തി​സ​ന്ധി​യി​ലാ​ക്കി​യി​രി​ക്ക​യാ​ണ്. ഉ​ട​ൻ അ​ന​സ്തെ​റ്റി​സ്റ്റി​നെ നി​യ​മി​ച്ചി​ല്ലെ​ങ്കി​ൽ രാ​ത്രി​യി​ലെ​ത്തു​ന്ന രോ​ഗി​ക​ൾ​ക്ക് അ​ടി​യ​ന്ത​ര ചി​കി​ത്സ ല​ഭി​ക്കാ​ൻ സ്വ​കാ​ര്യ ആ​ശു​പ​ത്രി​ക​ളെ ആ​ശ്ര​യി​ക്കേ​ണ്ട അ​വ​സ്ഥ​യാ​വും. നി​ല​വി​ലെ പ്ര​തി​സ​ന്ധി സം​ബ​ന്ധി​ച്ച് ആ​ശു​പ​ത്രി അ​ധി​കൃ​ത​ർ ആ​രോ​ഗ്യ വ​കു​പ്പി​ന്‍റെ ശ്ര​ദ്ധ​യി​ൽ​പ്പെ​ടു​ത്തി​യി​ട്ടു​ണ്ടെ​ങ്കി​ലും ന​ട​പ​ടി​യാ​യി​ട്ടി​ല്ല.

മാ​ത്ര​മ​ല്ല, അ​ന​സ്തേ​ഷ്യ ഡോ​ക്ട​ർ​മാ​രു​ടെ സേ​വ​നം ല​ഭ്യ​മാ​വാ​ത്ത​തു​കാ​ര​ണം മെ​ഡി​ക്ക​ൽ കോ​ള​ജി​ൽ എ​ല്ലാ വി​ഭാ​ഗ​ങ്ങ​ളി​ലും ശ​സ്ത്ര​ക്രി​യ മു​ട​ങ്ങാ​ൻ ഇ​ട​യാ​ക്കു​ന്നു​ണ്ട്. ഓ​ർ​ത്തോ, സ​ർ​ജ​റി തു​ട​ങ്ങി​യ വി​ഭാ​ഗ​ങ്ങ​ളി​ൽ നി​ര​വ​ധി പേ​രാ​ണ് ശ​സ്ത്ര​ക്രി​യ​ക്കാ​യി കാ​ത്തി​രി​ക്കു​ന്ന​ത്. വി​വി​ധ വി​ഭാ​ഗ​ങ്ങ​ളു​ടെ ഓ​രോ യൂ​നി​റ്റു​ക​ളി​ലും 40ഓ​ളം മേ​ജ​ർ ശ​സ്ത്ര​ക്രി​യ​ക​ൾ​വ​രെ കാ​ത്തി​രി​പ്പു​പ​ട്ടി​ക​യി​ലു​ണ്ട്. ഓ​ർ​ത്തോ വി​ഭാ​ഗ​ത്തി​ലാ​ണ് പ്ര​തി​സ​ന്ധി കൂ​ടു​ത​ൽ. അ​പ​ക​ട​ത്തി​ലും മ​റ്റും എ​ല്ലു​പൊ​ട്ട​ൽ അ​ട​ക്ക​മു​ള്ള പ​രി​ക്കേ​റ്റ​വ​ർ​ക്ക് ശ​സ്ത്ര​ക്രി‍യ ന​ട​ത്താ​ൻ ആ​ഴ്ച​ക​ൾ കാ​ത്തി​രി​ക്കേ​ണ്ട അ​വ​സ്ഥ​യു​മു​ണ്ട്. കാ​ൽ​മു​ട്ട് മാ​റ്റി​വെ​ക്ക​ൽ ശ​സ്ത്ര​ക്രി​യ​ക​ൾ ഇ​പ്പോ​ൾ ന​ട​ക്കു​ന്നി​ല്ലെ​ന്നും മാ​സ​ങ്ങ​ളാ​യി ത​ങ്ങ​ൾ ഇ​തി​നാ​യി കാ​ത്തി​രി​ക്കു​ക​യാ​ണെ​ന്നും രോ​ഗി​ക​ൾ പ​റ​ഞ്ഞു.

ശ​സ്ത്ര​ക്രി‍യ​ക്ക് കാ​ത്തി​രി​പ്പ് നീ​ളു​ന്ന​തോ​ടെ രോ​ഗി​ക​ൾ പ​ല​രും ഡി​സ്ചാ​ർ​ജ് വാ​ങ്ങി സ്വ​കാ​ര്യ ആ​ശു​പ​ത്രി​ക​ളി​ൽ ചി​കി​ത്സ തേ​ടി​പ്പോ​വു​ക​യാ​ണ്. ഇ​ത് സാ​ധാ​ര​ണ​ക്കാ​ർ​ക്ക് വ​ലി​യ സാ​മ്പ​ത്തി​ക ബാ​ധ്യ​ത വ​രു​ത്തി​വെ​ക്കു​ന്നു. വേ​ണ്ട​ത്ര അ​ന​സ്ത്യേ​ഷ്യ ഡോ​ക്ട​ർ​മാ​രെ ല​ഭ്യ​മാ​യാ​ൽ നി​ല​വി​ൽ കാ​ത്തു​കി​ട​ക്കു​ന്ന ശ​സ്ത്ര​ക്രി​യ​ക​ളെ​ല്ലാം യ​ഥാ​സ​മ​യം പൂ​ർ​ത്തി​യാ​ക്കാ​ൻ ക​ഴി​യു​മെ​ന്ന് ഡോ​ക്ട​ർ​മാ​ർ വ്യ​ക്ത​മാ​ക്കു​ന്നു.

ആ​ശു​പ​ത്രി അ​ധി​കൃ​ത​രു​ടെ നി​ര​ന്ത​ര ഇ​ട​പെ​ട​ലി​നെ​ത്തു​ട​ർ​ന്നാ​യി​രു​ന്നു കോ​ഴി​ക്കോ​ട് മെ​ഡി​ക്ക​ൽ കോ​ള​ജ് ആ​ശു​പ​ത്രി​യി​ൽ രാ​ത്രി​കാ​ല​ത്തേ​ക്കും അ​ന​സ്തെ​റ്റി​സ്റ്റി​നെ നി​യ​മി​ച്ചി​രു​ന്ന​ത്.