15 മാസം; മൃഗങ്ങൾ ന​ശിപ്പിച്ചത് 77 ലക്ഷത്തിന്‍റെ കൃഷി

കോഴിക്കോട്​: പന്നിയടക്കമുള്ള വന്യമൃഗങ്ങളുടെ ശല്യത്തിൽ പൊറുതിമുട്ടി ജില്ലയിലെ കർഷകർ. നിരവധി പേരുടെ ജീവൻ നഷ്ടമായതിന്​ പുറമേ വൻതുകയുടെ കൃഷിനാശവുമാണ്​ ജില്ലയിലുണ്ടായതെന്ന്​ കണക്കുകൾ വ്യക്​തമാക്കുന്നു. പന്നിക്ക്​ പുറമേ, മുള്ളൻപന്നി, കാട്ടാന എന്നിവയുടെയും ശല്യവും രൂക്ഷമാണ്​. 2021 ജനുവരി മുതൽ ഈ മാസം 24 വരെ 77.44 ലക്ഷം രൂപയുടെ കൃഷിയാണ്​ നശിപ്പിച്ചത്​. ഈ വര്‍ഷം ഇതുവ​രെ 10.05 ലക്ഷം രൂപയുടെ കൃഷി നശിപ്പിച്ചു. തെങ്ങ്​ മുതൽ വാഴയും ചേമ്പും കപ്പയും വരെ നശിപ്പിച്ചവയിൽപെടും. ജില്ലയിൽ 211 കർഷകരാണ്​ വന്യമൃഗശല്യത്തിന്​ ഇരയായത്​. 19.44 ഹെക്ടര്‍ സ്ഥലത്തെ കൃഷി നശിച്ചു. താമരശ്ശേരി, കുറ്റ്യാടി, പെരുവണ്ണാമൂഴി എന്നീ ഫോറസ്റ്റ്​ റേഞ്ച്​ ഓഫിസുകൾക്ക്​ കീഴിൽ പലയിടത്തും വന്യമൃഗശല്യം അതിരൂക്ഷമാണ്​. കുറ്റ്യാടി ഫോറസ്റ്റ്​ റേഞ്ചിന്​ കീഴിലാണ്​ ഏറ്റവും കൂടുതൽ കൃഷിനാശം. ഈ റേഞ്ചിൽപെട്ട കുന്നുമ്മൽ കാർഷിക ബ്ലോക്കിൽ 36.30 ലക്ഷം രൂപയുടെ നഷ്ടമുണ്ടായി. കൊടുവള്ളി ബ്ലോക്കിൽ .96 ഹെക്ടര്‍ ഭൂമിയില്‍ 30.85 ലക്ഷം രൂപയുടെ കൃഷി കാട്ടുമൃഗങ്ങൾ നശിപ്പിച്ചു. ഉള്ളിയേരി-1.12 ലക്ഷം, പേരാമ്പ്ര- 70,000 രൂപ, വടകര- 5000 രൂപ എന്നിങ്ങനെയാണ്​ മറ്റിടങ്ങളിലെ കണക്കുകൾ. ജില്ലയിൽ ആദ്യകാലത്ത്​ കാടിനോട്​ ചേർന്ന മലയോരപ്രദേശങ്ങളിലായിരുന്നു കാട്ടുപന്നികൾ വിളയാടിയിരുന്നത്​. എന്നാൽ, കാട്ടിൽനിന്ന്​ കിലോമീറ്റർ അകലെയുള്ള പ്രദേശങ്ങളിലും പന്നിശല്യം അതിരൂക്ഷമാണ്​. കൃഷി നശിപ്പിക്കുന്നതിനുമപ്പുറം ജീവൻ തന്നെ അപകടത്തിലാക്കുന്നതും ഭീഷണിയാണ്​. വളയം, ചെക്യാട്​, നാദാപുരം, പുറമേരി, കുറ്റ്യാടി, പനങ്ങാട്​, ഉണ്ണികുളം, താമരശ്ശേരി, പുതുപ്പാടി, കാരശ്ശേരി, കോടഞ്ചേരി, കൂടരഞ്ഞി, കട്ടിപ്പാറ, മാവൂർ, ചാത്തമംഗലം, മുക്കം, തിരുവമ്പാടി തുടങ്ങി നിരവധി തദ്ദേശസ്ഥാപനങ്ങളിലാണ്​ കാട്ടുപന്നികൾ കൂടുതലും വിലസുന്നത്​. പുറമേരി അരൂർ മലയാട പൊയിലിൽ കഴിഞ്ഞ ഡിസംബറിൽ ഒറ്റരാത്രി​​​കൊണ്ട് രണ്ടരയേക്കർ കൃഷിയാണ്​ പന്നികൾ ഇല്ലാതാക്കിയത്​. ജില്ലയിലെ 33 വില്ലേജുകൾ കാടുപന്നിശല്യത്തിന്‍റെ ഹോട്​സ്​പോട്ടായി പ്രഖ്യാപിച്ചിരുന്നു. എന്നാൽ, കോടഞ്ചേരി, തിരുവമ്പാടി, പുതുപ്പാടി അടക്കമുള്ള പ്രദേശങ്ങളെ ഒഴിവാക്കിയായിരുന്നു ഹോട്​സ്​പോട്ട്​ പ്രഖ്യാപിച്ചത്​. കാട്ടുപന്നിയെ ക്ഷുദ്രജീവിയായി പ്രഖ്യാപിക്കണമെന്ന സംസ്ഥാന സർക്കാറിന്‍റെ ആവശ്യം കഴിഞ്ഞദിവസം കേന്ദ്രം തള്ളിയത്​ മലയോരമേഖലയിലുള്ളവരുടെ ആശങ്ക കൂട്ടുന്നുണ്ട്​. ക്ഷുദ്രജീവിയായി ഒരുവർഷത്തേക്ക്​ പ്രഖ്യാപിക്കണമെന്നായിരുന്നു സംസ്ഥാനം ആവശ്യപ്പെട്ടത്​. എന്നാൽ, കടുവയടക്കമുള്ള ജീവികളുടെ ഇരപിടിത്തത്തെ ബാധിക്കുമെന്നായിരുന്നു കേന്ദ്രനിലപാട്​. ക്ഷുദ്രജീവിയായി പ്രഖ്യാപിച്ചാൽ പന്നിയെ ഏത്​ രീതിയിലും പിടികൂടാമായിരുന്നു. നിലവിൽ വനംവകുപ്പിന്‍റെ എംപാനൽ ലിസ്റ്റിലുള്ളവർക്ക്​ ​വെടി​വെച്ചുകൊല്ലാൻ മാത്രമാണ്​ അനുമതി. ഇതിന്​ വനംവകുപ്പ്​ ഉദ്യോഗസ്ഥരുടെ സാന്നിധ്യവും അത്യാവശ്യമാണ്​. സ്വന്തം ലേഖകൻ