പൗരത്വസമരം: ആദ്യം കുറ്റപത്രം നൽകിയ കേസിൽ ടി. സിദ്ദീഖടക്കം 57 പ്രതികളെയും വിട്ടയച്ചു

കോഴിക്കോട്: പൗരത്വ നിയമഭേദഗതിക്കെതി​രായ സമരത്തിന്‍റെ ഭാഗമായി ഹെഡ്​പോസ്​റ്റ്​ ഓഫിസിനു മുന്നിൽ ജില്ല കോൺഗ്രസ്​ കമ്മിറ്റി സംഘടിപ്പിച്ച 'ബ​ച്ചാവോ ഇന്ത്യ' പ്രതി​ഷേധത്തിലെ ആക്രമണവുമായി ബന്ധപ്പെട്ട കേസിൽ കെ.പി.സി.സി വർക്കിങ് പ്രസിഡന്‍റ്​ ടി. സിദീഖ്​ എം.എൽ.എയടക്കം 57 പേരെയും വിട്ടയച്ചു. പൗരത്വ പ്രതിഷേധത്തിൽ സംസ്​ഥാനത്ത്​ ആദ്യം കുറ്റപത്രം സമർപ്പിച്ച കേസിലാണ്​ കോഴിക്കോട് ചീഫ് ജുഡീഷ്യൽ മജിസ്ട്രേറ്റ് എ. ഫാത്തിമബീവിയുടെ വിധി. പൊതുമുതൽ നശിപ്പിച്ചു, പൊലീസുകാരെ ആക്രമിച്ചു എന്നീ കുറ്റങ്ങൾ ചുമത്തിയ കേസിൽ പ്രതികളാണ്​ കുറ്റം ചെയ്തതെന്ന്​ തെളിയിക്കാനായില്ലെന്ന്​ കണ്ടെത്തിയാണ്​ നടപടി. പ്രതികൾക്കായി അഡ്വ. എം. ഷഹീർ സിങ്​, അഡ്വ. പി. രാജേഷ്​കുമാർ എന്നിവർ ഹാജരായി. കെ.പി.സി.സി ജനറൽ സെക്രട്ടറി പി.എം. നിയാസ്, ഡി.സി.സി പ്രസിഡന്‍റ്​​​ കെ. പ്രവീൺ കുമാർ, ഡി.സി.സി ഭാരവാഹികളായ ദിനേശ് പെരുമണ്ണ, നിജേഷ് അരവിന്ദ്, യൂത്ത് കോൻഗ്രസ് ദേശീയ സെക്രട്ടറി വിദ്യ ബാലകൃഷ്ണൻ, ജില്ല പ്രസിഡന്റ് ആർ. ഷഹിൻ, സംസ്ഥാന ജന.സെക്രട്ടറി വി.പി. ദുൽഫിഖിൽ, കെ.എസ്.യു ജില്ല പ്രസിഡന്‍റ്​ വി.ടി. നിഹാൽ തുടങ്ങിയവരും വിട്ടയച്ചവരിൽപെടുന്നു. 2019 ഡിസംബർ 21ന് ഉച്ചക്കായിരുന്നു മാർച്ച്​. ഉദ്​ഘാടകനായ ശശി തരൂർ പ്രസംഗം അവസാനിപ്പിച്ചശേഷം ​കോൺഗ്രസ്​ പ്രവർത്തകർ ഗേറ്റ്​ തള്ളിത്തുറന്ന്​ പ്രതീകാത്​മകമായി പോസ്​​റ്റ്​ ഓഫിസ്​ പിടിച്ചെടുത്തിരുന്നു. പൊലീസുകാരെ ആക്രമിക്കുകയും ജീപ്പ് തകർക്കുകയും ഹെഡ്പോസ്റ്റോഫിസിലെ ഹാൻഡ്​​റെയിലടക്കം കേടാക്കുകയും ചെയ്തെന്നാണ് ടൗൺ, കസബ പൊലീസെടുത്ത കേസ്​. കേസിൽ പ്രതികൾക്ക്​ നാലു ദിവസം ജയിലിൽ കഴിഞ്ഞശേഷമാണ്​ ജാമ്യം കിട്ടിയത്​. കഴിഞ്ഞ വർഷം കുറ്റപത്രം സമർപ്പിച്ച കേസിൽ ഡിസംബർ 20ന് വിചാരണ നടപടികൾ തുടങ്ങി. 25 സാക്ഷികളെയാണ് വിസ്തരിച്ചത്. ഉയർന്ന പൊലീസുകാരും ഹെഡ്പോസ്റ്റോഫിസ് ജീവനക്കാരുമടക്കം മുഴുവൻ ദൃക്സാക്ഷികളും സർക്കാർ ഉദ്യോഗസ്​ഥരായ കേസിലാണ്​ വിധി. മോദി ഭരണത്തിനായി വിടുപണി ചെയ്യുന്ന പിണറായി സർക്കാറിനും പൊലീസിനും കിട്ടിയ തിരിച്ചടിയാണ് കോടതി വിധിയെന്ന് കോൺഗ്രസ്​ നേതാക്കൾ പ്രതികരിച്ചു.