വടകര മണ്ഡലത്തിൽ 5.2 കോടിയുടെ പദ്ധതികൾ

വടകര: സംസ്ഥാന ബജറ്റിൽ മണ്ഡലത്തിൽ 5.2കോടിയുടെ പദ്ധതികൾക്ക് അനുമതി ലഭിച്ചു. അഴിയൂർ പൂഴിത്തല മത്സ്യഷെഡ് നിർമാണത്തിന് 1.5 കോടി, വടകര ഗവ.ആയുർവേദ ആശുപത്രി കെട്ടിട നിർമാണത്തിന് 50 ലക്ഷം, ആർ.ഡി.ഒ ഓഫിസ് നിർമാണത്തിന് 1.5 കോടി, ഒ.വി.സി തോട് നവീകരണത്തിന് 1.7 കോടി രൂപ എന്നിവയാണ് അനുവദിച്ചത്. മോഡൽ പോളിടെക്നിക്കിൽ സെമിനാർ ഹാൾ നിർമാണം, മടപ്പള്ളി ഗവ.കോളജിൽ ലേഡീസ് ഹോസ്റ്റൽ നിർമാണം, മൂരാട് പാലം മുതൽ സാൻഡ് ബാങ്ക്സ് വരെ പുഴയോര നടപ്പാത നിർമാണം, മടപ്പള്ളി ബോയ്സ് സ്കൂളിൽ സ്പോർട്സ് കോംപ്ലക്സ് കം ക്ലാസ് റൂം നിർമാണം, അഴിയൂർ അണ്ടിക്കമ്പനി സ്ഥലത്ത് നാളികേര സംസ്കരണ യൂനിറ്റ്, അഴിയൂർ മൃഗാശുപത്രി കെട്ടിടനിർമണം, വടകര- അഴിയൂർ-കുറ്റ്യാടി ഇറിഗേഷൻ ബ്രാഞ്ച് കനാലും അനുബന്ധ കനാലുകളും നവീകരിക്കൽ, മാഹി മുതൽ തുരുത്തി മുക്കുവരെ പുഴഭിത്തി കെട്ടി സംരക്ഷിച്ച് നടപ്പാത നിർമിക്കൽ, വടകര നഗരസഭ, ചോറോട്, ഏറാമല പഞ്ചായത്തുകളിലൂടെ പോകുന്ന എൻ.സി കനാൽ നവീകരണം, വടകര അഴിത്തല ബോട്ട് ജെട്ടി നിർമാണം, വടകര കുടുംബകോടതി കെട്ടിട നിർമാണം, തുരുത്തിമുക്ക് പാലം നിർമാണം, റൂറൽ ജില്ല ജയിൽ കെട്ടിട നിർമാണം, വെള്ളിയാങ്കല്ല് സമുദ്ര സാഹസിക ടൂറിസം പദ്ധതി എന്നിവക്ക് ടോക്കൺ തുകയും അനുവദിച്ചു.