പോപുലർ ഫ്രണ്ട് ഐ.ജി ഓഫിസ്​ മാർച്ച്​ 30ന്​

കോഴിക്കോട്​: പൊലീസ്​ ഭീകരത അവസാനിപ്പിക്ക​ണമെന്നാവശ്യപ്പെട്ട് ഏപ്രിൽ 30ന്​ കോഴിക്കോട്​ നടക്കാവിലെ ഉത്തരമേഖല ഐ.ജി ഓഫിസിലേക്ക്​ മാർച്ച്​ നടത്തുമെന്ന് പോപുലർ ഫ്രണ്ട്​ ഓഫ്​ ഇന്ത്യ ​ഭാരവാഹികൾ വാർത്തസമ്മേളനത്തിൽ അറിയിച്ചു. പാലക്കാട്​ കൊലപാതകത്തിന്‍റെ മറവിൽ പൊലീസ്​ നിരപരാധികളെ വേട്ടയാടുകയാണെന്ന് സംസ്ഥാന സെക്രട്ടറി സി.എ. റഊഫ് പറഞ്ഞു. സംഭവത്തിന്‍റെ പേരിൽ പാലക്കാട്​​ ജില്ലയിലെ മുസ്​ലിം യുവാക്കളെ ഏകപക്ഷീയമായി വേട്ടയാടാനാണ്​ പൊലീസ്​ ​ശ്രമം. പാലക്കാട്​ വീണ്ടും ആക്രമണത്തിന്​ ആർ.എസ്​.എസ്​ പദ്ധതിയിട്ട വിവരം പൊലീസ്​ തന്നെ പറയുന്നുണ്ടെങ്കിലും അത്​ അന്വേഷിക്കാനോ ക്രിമിനലുക​​ളെ കസ്റ്റഡിയിൽ എടുക്കാനോ പൊലീസ്​ തയാറാകുന്നില്ല. കേരള ​പൊലീസ്​ ആർ.എസ്​.എസ്​ ആയി മാറിയിരിക്കുകയാണ്​. വെൽഫെയർ പാർട്ടിയുടെയും പി.ഡി.പിയുടെയും പ്രവർത്തകർക്കെതിരെയും പൊലീസ്​ നടപടി എടുക്കുന്നുണ്ട്​. സുബൈർ വധക്കേസിൽ പൊലീസിന്‍റെ അന്വേഷണം കാര്യക്ഷമമല്ല. മൂന്നുമാസം മുമ്പ്​ തന്നെ സുബൈറിനെ വധിക്കാൻ ഗൂഢാലോചന നടന്നുവെന്ന വിവരം പുറത്തുവന്നിട്ടും പൊലീസ്​ വേണ്ട അന്വേഷണം നടത്തുന്നില്ല. മൂന്നു പ്രതികൾ, രണ്ട്​ കാർ, നാലു വാളുകൾ എന്ന പൊലീസ്​ വാദം വിശ്വസനീയമല്ല. ബി.ജെ.പി സംസ്ഥാന പ്രസിഡന്‍റ്​ കെ. സുരേന്ദ്രൻ ഗൂഢാലോചനയിൽ പങ്കാളിയാണെന്ന്​ ഭരണകക്ഷിയുടെ ജില്ല സെക്രട്ടറി തന്നെ ചൂണ്ടിക്കാട്ടിയതാണ്​. എന്നിട്ടും പൊലീസ്​ മൗനം തുടരുന്നത്​ ആരുടെ താൽപര്യം സംരക്ഷിക്കാനാണെന്നും റഊഫ്​ ചോദിച്ചു. വി.കെ. അബ്​ദുൽ ലത്തീഫ്​, സി. അബ്​ദുൽ നാസർ എന്നിവരും വാർത്തസമ്മേളനത്തിൽ പ​ങ്കെടുത്തു.