'പവർ ടു ദ പിരീഡ്' നൈറ്റ് റൺ 28ന്

കോഴിക്കോട്: ആർത്തവ ശുചിത്വ ബോധവത്കരണം, അതുമായി ബന്ധപ്പെട്ട മിഥ്യാധാരണകൾ അകറ്റുക എന്നിവ ലക്ഷ്യമിട്ട് ആർത്തവ ശുചിത്വദിനമായ മേയ് 28ന് 'പവർ ടു ദ പിരീഡ്' നൈറ്റ് റൺ സംഘടിപ്പിക്കുന്നു. ജില്ല ഭരണകൂടത്തിന്റെയും ജെൻഡർ പാർക്കിന്റെയും ആഭിമുഖ്യത്തിൽ ഐ.എം.എ, ജെ.സി.ഐ കാലിക്കറ്റ്, ഡെക്കാത്ലോൺ, റെഡ് എഫ്.എം, അബീർ മെഡിക്കൽ ​ഗ്രൂപ് എന്നിവരുടെ സഹകരണത്തോടെ മേക് സെൻസ് ഓഫ് മെൻസസ് എന്ന ഹാഷ് ടാ​ഗോടെയാണ് പരിപാടി. രാത്രി 8.30ന് കോഴിക്കോട് ബീച്ചിലെ 'നമ്മുടെ കോഴിക്കോട്' ഇൻസ്റ്റലേഷനിൽ നിന്നാരംഭിച്ച് വെള്ളയിൽ ഹാർബർ വഴി തിരിച്ച് സ്റ്റാർട്ടിങ് പോയന്റിൽ അവസാനിക്കും. ദിനാചരണത്തോടനുബന്ധിച്ച് വെബിനാറുകൾ, ചർച്ചകൾ, സൈക്കിൾ റാലി, സോഷ്യൽ മീഡിയ ചലഞ്ചുകൾ, ക്വിസ് തുടങ്ങിയവയും ഒരുക്കുന്നുണ്ട്.