നാദാപുരം മേഖലയിൽ 263 പേർക്ക്​ കോവിഡ്​

നാദാപുരം: വിവിധ പഞ്ചായത്തുകളിൽ ബുധനാഴ്​ചയും വ്യാപകമായി കോവിഡ് കേസുകൾ കണ്ടെത്തി. 263 പോസിറ്റിവ് കേസുകളാണ് കണ്ടെത്തിയത്. ഇതിൽ 26 എണ്ണത്തി​ൻെറ ഉറവിടം വ്യക്തമല്ല. ഉറവിടം വ്യക്തമല്ലാത്ത പോസിറ്റിവ് കേസുകൾ. ചെക്യാട് 4, നാദാപുരം12, പുറമേരി 3, തൂണേരി 3, വളയം 1, വാണിമേൽ 3. സമ്പർക്കം വഴി കോവിഡ് പോസിറ്റിവായവർ: ചെക്യാട് 55, നാദാപുരം 29, നരിപ്പറ്റ 12, പുറമേരി 63, തൂണേരി 12, വളയം 34, വാണിമേൽ 32. കടകൾക്ക് നിയന്ത്രണം തുടരുന്നതിനാൽ ടൗണുകളെല്ലാം വിജനമായി. അവശ്യവസ്തുക്കളുടെ വിൽപനശാലകൾ മാത്രമാണ് പ്രവർത്തിക്കുന്നത്. ടൗണുകളിൽ ആളുകൾ കുറഞ്ഞത്​ ബസ് സർവിസിനെ സാരമായി ബാധിച്ചു. ചുരുക്കംചില ബസുകൾ മാത്രമാണ് ഓടിയത്. ഇവയും അടുത്ത ദിവസം മുതൽ സർവിസ് നിർത്തിവെക്കും. നഷ്​ടം സഹിച്ച്​ സർവിസ് തുടരാനാകില്ലെന്ന് ബസുടമകൾ പറഞ്ഞു. ഇതിനിടയിൽ നിയന്ത്രണങ്ങളുമായി ബന്ധപ്പെട്ട് നാട്ടുകാരെ പരിഭ്രാന്തിയിലാക്കി വ്യാജ വാർത്തകൾ പ്രചരിക്കുന്നതായി പരാതിയുയർന്നു. കടകൾ തുറക്കുന്ന സമയം രാവിലെ ഒമ്പതു മുതൽ ഉച്ചക്ക് ഒരു മണി വരെയാണ്​, പുറത്തിറങ്ങുന്നവർ 3000 രൂപ പിഴ അടക്കണം, സ്വകാര്യ വാഹനങ്ങളിലും മൂന്നു പേർ മാത്രമേ സഞ്ചരിക്കാവു എന്നിങ്ങനെയുള്ള വ്യാജ പ്രചാരണങ്ങളാണ് സമൂഹ മാധ്യമങ്ങൾ വഴി പ്രചരിക്കുന്നത്. നിലവിലെ നിയമങ്ങൾ പാലിക്കണമെന്നും കോവിഡ് നിയന്ത്രണ പ്രവർത്തനങ്ങളിൽ എല്ലാവരും സഹകരിക്കണമെന്നും ആരോഗ്യ പ്രവർത്തകർ ആവശ്യപ്പെട്ടു.