കരിപ്പൂർ വികസനം: എം.ഡി.എഫ്​ സത്യഗ്രഹം 13 മുതൽ

കോഴിക്കോട്​: കരിപ്പൂർ വിമാനത്താവള വികസനത്തിനാവശ്യമായ 100 ഏക്കർ ഭൂമി ഉടൻ ഏറ്റെടുക്കുക, വലിയ വിമാനങ്ങൾക്കുള്ള വിലക്ക് പിൻവലിക്കുക, വിമാനാപകട അന്വേഷണ റിപ്പോർട്ട്‌ പ്രസിദ്ധീകരിക്കുക എന്നീ ആവശ്യങ്ങളുന്നയിച്ച് മലബാർ ഡെവലപ്​മൻെറ്​ ഫോറം (എം.ഡി.എഫ്​) ജനുവരി 13, 14, 15 തീയതികളിൽ കോഴിക്കോട്ട്​ സത്യഗ്രഹം സംഘടിപ്പിക്കുമെന്ന്​ ഭാരവാഹികൾ വാർത്തസമ്മേളനത്തിൽ അറിയിച്ചു. 13ന്​ മേയർ ഡോ. ബീനാ ഫിലിപ്​ ഉദ്​ഘാടനം ചെയ്യും. മലബാറിലെ രാഷ്​ട്രീയ -സാമൂഹിക -മത -സാംസ്‌കാരികരംഗത്തെ പ്രമുഖർ സമരത്തിൽ പങ്കെടുക്കും. തുടർന്നും നടപടി സ്വീകരിച്ചില്ലെങ്കിൽ ഫെബ്രുവരി ആദ്യവാരം കരിപ്പൂരിലേക്ക് മാർച്ച്‌ സംഘടിപ്പിക്കും. വർക്കിങ് ചെയർമാൻ എസ്.എ. അബൂബക്കർ, രക്ഷധികാരി ഗുലാം ഹുസൈൻ, ഓർഗനൈസിങ്​ സെക്രട്ടറി പി.എ. ആസാദ്, ട്രഷറർ വി.പി. സന്തോഷ്‌ കുമാർ എന്നിവർ വാർത്തസമ്മേളനത്തിൽ പ​ങ്കെടുത്തു.