തെരുവിൽനിന്ന്​ 12 പേർക്ക് അഭയം

കോഴിക്കോട്: നഗരപ്രദേശത്ത് ആരോരുമില്ലാതെ തെരുവിൽ കഴിഞ്ഞിരുന്ന 12 പേർക്ക്​ ഉദയം ഹോമിൽ അഭയം നൽകി ജില്ല ലീഗൽ സർവിസസ് അതോറിറ്റി. തെരുവോരങ്ങളിൽ കഴിയുന്ന അശരണരെ സഹായിക്കാൻ വിവിധ സർക്കാർ വകുപ്പുകളുടെ സഹായത്തോടെ ജില്ല ലീഗൽ സർവിസസ് അതോറിറ്റി നടപ്പാക്കുന്ന അശരണർക്ക് ഒപ്പമുണ്ട് എപ്പോഴും പദ്ധതിയിലാണ്​ നപടി. വിവിധ ഇടങ്ങളിൽനിന്നായി കോഴിക്കോട് നഗരത്തിൽ എത്തി തെരുവിൽ കഴിഞ്ഞിരുന്ന 12 പേരെയാണ് ജില്ല ലീഗൽ സർവിസസ് അതോറിറ്റി മുഖാന്തരം ഉദയം ഹോമിൽ എത്തിച്ചത്. പാരാ ലീഗൽ വളന്റിയർമാരായ പ്രേമൻ പറന്നാട്ടിൽ, സലീം വട്ടക്കിണർ, മുനീർ മാത്തോട്ടം എന്നിവരുടെ നേതൃത്വത്തിൽ വിവിധ വകുപ്പുകളുടെ സഹായത്തോടെയാണ് ഏറ്റെടുത്തത്. മെഡിക്കൽ കോളജിൽ പ്രാഥമിക വൈദ്യപരിശോധനകൾക്കും കോവിഡ്​ പരിശോധനക്കും ഇവരെ ഹോമിൽ എത്തിച്ചതായി സെക്രട്ടറി സബ് ജഡ്ജ് എം.പി. ഷൈജൽ അറിയിച്ചു.