കണ്ണൂർ സർവകലാശാല ചോദ്യപേപ്പർ ആവർത്തനം; സ്ഥാനമൊഴിയാൻ കത്തുനൽകി പരീക്ഷ കൺട്രോളർ

കണ്ണൂർ: കണ്ണൂർ സർവകലാശാല ബിരുദ പരീക്ഷകളിലെ ചോദ്യ​പേപ്പർ ആവർത്തനവുമായി ബന്ധപ്പെട്ട സംഭവത്തിൽ പരീക്ഷ കൺട്രോളർ സ്ഥാനമൊഴിയുന്നു. സംഭവത്തിൽ ഉത്തരവാദിത്തം ഏറ്റെടുത്ത​ പരീക്ഷ കൺട്രോളർ പി.ജെ. വിൻസെന്‍റ്,​ ​ ഡെപ്യൂട്ടേഷൻ ഒഴിവാക്കി നൽകണമെന്നാവശ്യപ്പെട്ട്​ വൈസ്​ ചാൻസലർക്ക്​ കത്ത്​ നൽകി. ചേദ്യപേപ്പർ ആവർത്തനമടക്കമുള്ള വിവാദങ്ങളുടെ പശ്ചാത്തലത്തിൽ പരീക്ഷ കൺട്രോളർ പത്തുദിവസമായി അവധിയിലായിരുന്നു. അവധി കഴിഞ്ഞ്​ കഴിഞ്ഞ ദിവസം ജോലിയിൽ പ്രവേശിച്ചതിനെ തുടർന്നാണ്,​ ഡെപ്യൂട്ടേഷൻ റദ്ദാക്കണമെന്നും സർക്കാർ സർവിസിലേക്ക്​ തിരിച്ചുപോകാൻ അനുവദിക്കണമെന്നും ആവശ്യപ്പെട്ട്​ വി.സിക്ക്​ കത്ത്​ നൽകിയത്​. കത്ത്​ വി.സി അംഗീകരിച്ചു. ചൊക്ലിയിലെ തലശ്ശേരി ഗവ. കോളജിൽ സ്​പെഷൽ ഓഫിസറായിരുന്ന വിൻസെന്‍റ്​ ഡെപ്യൂട്ടേഷനിലാണ് കണ്ണൂർ സർവകലാശാല പരീക്ഷ കൺട്രോളറായി ചുമതലയേറ്റത്​. ഈ വർഷത്തെ മൂന്നാം സെമസ്റ്റർ ബിരുദ സൈക്കോളജി, ബി.എസ്​സി ന്യൂറോ ബയോളജിക്കൽ പേഴ്സ്‍പെക്​ടിവ്​ പരീക്ഷകളിൽ കഴിഞ്ഞ വർഷത്തെ ചോദ്യപേപ്പർ അതേപടി ആവർത്തിച്ചു. തുടർന്ന്​ രണ്ട്​ പരീക്ഷകൾ സർവകലാശാല റദ്ദാക്കുകയായിരുന്നു. ഇതിനു പിന്നാലെ ബോട്ടണി ബിരുദ മൂന്നാം സെമസ്റ്റർ പരീക്ഷയിലും കഴിഞ്ഞ വർഷത്തെ മിക്ക ചോദ്യങ്ങളും ആവർത്തിച്ചു. ഇതേത്തുടർന്ന്​ കണ്ണൂർ സർവകലാശാലയുടെ പരീക്ഷ നടത്തിപ്പിൽ വ്യാപക വിമർശനമുയർന്നു. സംഭവത്തിൽ വി.സിയുടെ ഉത്തരവ്​ പ്രകാരം രണ്ടംഗ സമിതി അന്വേഷണം നടത്തി, പരീക്ഷ കൺട്രോളറടക്കം മൂന്ന്​ അധ്യാപകർക്ക്​ വീഴ്ച പറ്റിയതായി കണ്ടെത്തി. ഇതിന്‍റെ പശ്ചാത്തലത്തിലാണ്​ കൺട്രോളർ അവധിയിൽ പ്രവേശിച്ചതും ഇപ്പോൾ ഡെപ്യൂട്ടേഷൻ ഒഴിവാക്കണമെന്നാവശ്യപ്പെട്ട്​ കത്ത്​ നൽകിയതും.