പൂളക്കടവ് റെഗുലേറ്റർ കം ബ്രിഡ്ജ്; അവലോകന യോ​ഗം നടത്തി

വെള്ളിമാട്​കുന്ന്​: പൂളക്കടവ് റെ​ഗുലേറ്റർ കം ബ്രിഡ്ജിന്‍റെ പ്രവർത്തനങ്ങളുമായി ബന്ധപ്പെട്ട് മന്ത്രി എ.കെ. ശശീന്ദ്രന്‍റെ അധ്യക്ഷതയിൽ അവലോകന യോ​ഗം ചേർന്നു. നിലവിൽ നടന്നുകൊണ്ടിരിക്കുന്ന പ്രവൃത്തികൾ യുദ്ധകാലാടിസ്ഥാനത്തിൽ പൂർത്തീകരിക്കാൻ‍ മന്ത്രി ബന്ധപ്പെട്ട വകുപ്പുകൾക്ക് നിർദേശം നൽകി. ഇതിനായി ഉദ്യോ​ഗസ്ഥ തലത്തിൽ ആവശ്യമായ പ്രവർത്തനങ്ങൾ അടിയന്തരമായി പൂർത്തിയാക്കാനും മഴക്കുമുമ്പ്​ പൈലിങ് ഉൾപ്പെടെ പൂർത്തീകരിക്കാൻ നിലവിലെ പ്രവർത്തനങ്ങൾ ഊർജിതപ്പെടുത്താനും മന്ത്രി നിർദേശിച്ചു. പ്രവൃത്തിയിൽ വീഴ്ച വരുത്തരുതെന്ന് കരാറുകാരനും നിർദേശം നൽകി. അപ്രോച്ച് റോഡുമായി ബന്ധപ്പെട്ട വിഷയങ്ങൾ, നിർമാണ സാമ​​ഗ്രികൾ എത്തിക്കുന്നതിനായി ഇറി​ഗേഷൻ വകുപ്പിൽനിന്ന് ലഭിക്കേണ്ട അനുമതി എന്നിവ സംബന്ധിച്ചും യോ​ഗം ചർച്ച ചെയ്തു. തുടർനടപടികൾ പരിശോധിക്കുന്നതിനായി മേയ് 20ന് വീണ്ടും യോ​ഗം ചേരാനും തീരുമാനിച്ചു. റവന്യൂ, ഇറി​ഗേഷൻ, വാട്ടർ അതോറിറ്റി, വനം വകുപ്പ് തുടങ്ങിയ വകുപ്പുകൾ പ്രവൃത്തിയുമായി ബന്ധപ്പെട്ട മുഴുവൻ രേഖകളും 20നു നടക്കുന്ന യോ​ഗത്തിൽ അവതരിപ്പിക്കണമെന്നും മന്ത്രി നിർദേശിച്ചു. മന്ത്രി എ.കെ. ശശീന്ദ്രൻ ​ഗതാഗത മന്ത്രിയായിരിക്കെയാണ് കുരുവട്ടൂർ പഞ്ചായത്തിൽ പൂനൂർ പുഴക്കുകുറുകെ പൂളക്കടവിൽ റഗുലേറ്റർ കം ബ്രിഡ്ജിനായി കിഫ്ബിയിൽനിന്നും 30 കോടി രൂപ അനുവദിച്ചത്. കുരുവട്ടൂർ പഞ്ചായത്തിനെയും കോഴിക്കോട് കോർപറേഷനെയും ബന്ധിപ്പിക്കുന്ന റഗുലേറ്റർ കം ബ്രിഡ്ജിന്റെ നിർമാണ ഏജൻസി കേരള ഇറിഗേഷൻ ഇൻഫ്രാസ്ട്രക്ചർ ഡെവലപ്‌മെന്റ് കോർപറേഷനാണ്. ​ഗവ. ​ഗെസ്റ്റ് ഹൗസിൽ ചേർന്ന യോ​ഗത്തിൽ ​ഗ്രാമപഞ്ചായത്ത് പ്രസിഡന്‍റ്​ എ. സരിത, ബ്ലോക്ക് പഞ്ചായത്ത് അം​ഗം എം. ജയപ്രകാശ്, മുൻ പഞ്ചായത്ത് പ്രസിഡന്‍റ്​ പി. അപ്പുക്കുട്ടൻ, കെ. ചന്ദ്രൻ മാസ്റ്റർ, പ്രോജക്ട് എൻജിനീയർ അതുൽ അഷർ, കെ.ഐ.ഐ.ഡി.സി ഡി.ജി.എം ജമാലുദ്ദീൻ, ഊരാളുങ്കൽ ലേ​ബർ സൊസൈറ്റി, കേരള വാട്ടർ അതോറിറ്റി, ഇറി​ഗേഷൻ ഉൾപ്പെടെയുള്ള വകുപ്പുകളുടെയും ഉയർന്ന ഉദ്യോ​ഗസ്ഥർ തുടങ്ങിയവർ പങ്കെടുത്തു.