സ്വകാര്യ ഭൂമി കെ.എസ്.ഇ.ബി കൈയേറിയതായി പരാതി

കക്കോടി: കെ.എസ്.ഇ.ബി സ്വകാര്യ ഭൂമിയിൽ അതിക്രമിച്ചുകയറി സ്റ്റേ വയർ സ്ഥാപിച്ചതായി പരാതി. അഞ്ചു വർഷമായി ത്രീ ഫേസ് ലൈനിന്‍റെ സ്റ്റേ മരത്തിൽ കെട്ടിയ നിലയിലായിരുന്നു. തന്റെ അനുമതിയില്ലാതെയാണ് കെ.എസ്.ഇ.ബി ഇതു സ്ഥാപിച്ചതെന്നാണ് സ്ഥലം ഉടമ കോട്ടുപാടം സിജു രാജൻ പറയുന്നു​.​ ഇതു പറമ്പിൽനിന്നും നീക്കണമെന്നാവശ്യപ്പെട്ട് നിരവധി തവണ പരാതി നൽകിയിട്ടും നടപടിയുണ്ടായില്ല. റോഡിന്‍റെ മറുവശത്ത് സർക്കാർ ഭൂമി നിലനിൽക്കെയാണ് കെ.എസ്.ഇ.ബിയുടെ അതിക്രമമെന്ന്, വിവരാവകാശ നിയമപ്രകാരം ഉടമ കൊടുത്ത കത്തിന്റെ മറുപടിയിൽനിന്നും വ്യക്തമായിട്ടുണ്ട്​. ഇതു എ.ഡി.എമ്മിനെ നേരിട്ടും സർക്കാർ ഭൂമിയുടെ സ്കെച്ച് സഹിതം കത്ത് മുഖാന്തരം അറിയിച്ചിട്ടും പരാതി ഗൗനിച്ചില്ലെന്നും കഴിഞ്ഞ ദിവസം കെ.എസ്​.ഇ.ബി ജീവനക്കാരെത്തി സ്​റ്റേ വയർ സ്ഥാപി​ച്ചെന്നുമാണ്​ പരാതി. ജില്ല കലക്ടർ, സ്ഥലം നേരിട്ടുവന്ന് പരിശോധിക്കാമെന്നും അതുവരെ ഒരു നടപടിയും ഉണ്ടാവില്ലെന്നും ഉറപ്പു നൽകിയതായി ഉടമ പറയുന്നു. ഈ വിഷയത്തിൽ എ.ഇയോടും എ.ഡി.എമ്മിനോടും റിപ്പോർട്ട് നൽകാൻ മനുഷ്യാവകാശ കമീഷൻ ആവശ്യപ്പെട്ടിട്ടുണ്ടെന്നും സിജു രാജൻ പറഞ്ഞു.