കോഴിക്കോട്ട് പുതിയ ഫുട്ബാൾ അക്കാദമി; അര്‍ജന്‍റീനിയന്‍ പരിശീലകര്‍

കോഴിക്കോട്: അന്താരാഷ്ട്രനിലവാരവമുള്ള ഫുട്‌ബാൾ താരങ്ങളെ വാർത്തെടുക്കാൻ കോഴിക്കോട്ട്​ ഫുട്‌ബാള്‍ അക്കാദമി വരുന്നു. മലബാർ ‍സ്പോർട്സ് ആൻഡ്​ റിക്രിയേഷൻ ‍ഫൗണ്ടേഷൻ (എം.എസ്.ആർ.എഫ്) എന്ന പേരിൽ സെപ്റ്റംബറിൽ പ്രവർത്തനമാരംഭിക്കുമെന്ന്​ സംഘാടകർ വാർത്തസമ്മേളനത്തിൽ അറിയിച്ചു. മറഡോണ ഉൾപ്പെടെ നിരവധി ലോകോത്തര താരങ്ങളെ വാർത്തെടുത്ത ഫുട്‌ബാൾ അക്കാദമിയായ അർജന്‍റീനോസ് ജൂനിയേഴ്‌സുമായി കൈകോർത്താണ് എം.എസ്.ആർ.എഫ് പ്രവർത്തിക്കുക. കോച്ചുകൾക്കും കളിക്കാർക്കും അർജന്‍റീനോസ് ജൂണിയേഴ്‌സ് പരിശീലനം നല്കുന്നതിനായി അവരുടെ രണ്ട് കൺസൽട്ടന്‍റ്​ കോച്ചുകളുടെ സേവനം ലഭ്യമാക്കുന്നതുസംബന്ധിച്ച കരാർ മേയ്​ 10ന് ഉച്ച 12ന്​ മലബാർ പാലസിൽ നടക്കുന്ന ചടങ്ങിൽ ഒപ്പുവെക്കും. ഫുട്‌ബാൾ അക്കാദമിയുടെയും ക്ലബിന്റെയും പേര് പ്രഖ്യാപിക്കലും ടീമിന്‍റെ ലോഗോ പ്രകാശനവും ക്ലബിന്‍റെ വെബ്‌സൈറ്റ് ലോഞ്ചിങ്ങും അന്ന്​ നടക്കും. 2031ലെ അണ്ടർ 20 ലോകകപ്പ് 2034ലെ ലോകകപ്പ് ഫുട്ബാൾ എന്നിവയുടെ അവസാന റൗണ്ടുകളിൽ ‍ഇന്ത്യൻ ടീമിന്റെ സാന്നിധ്യമാണ് ലക്ഷ്യം. വാർത്തസമ്മേളനത്തിൽ ചെയർമാൻ ബി. വിജയൻ, സി.ഇ.ഒ സജീവ് ബാബു കുറുപ്പ്, ഡയറക്ടർ ഡോ. മനോജ് കാളൂർ എന്നിവർ പങ്കെടുത്തു.