കെ.എസ്​.ആർ.ടി.സി സമരം പൂർണം; ജനം വലഞ്ഞു

കോഴിക്കോട്​: ശമ്പളം വൈകുന്നതിൽ പ്രതിഷേധിച്ച്​ കെ.എസ്​.ആർ.ടി.സി തൊഴിലാളികൾ നടത്തിയ സമരം പൂർണമായതിനാൽ യാത്രക്കാർ വലഞ്ഞു. സി.ബി.എസ്​.ഇ പത്താം ക്ലാസ്​ പരീക്ഷക്കു പോകുന്ന വിദ്യാർഥികളെയും സമരം വലച്ചു. വ്യാഴാഴ്​ച അർധരാത്രി മുതൽ കോഴി​ക്കോട്​ ബസ്​സ്റ്റാൻഡിൽ ദുരിതം ആരംഭിച്ചു. സി.ഐ.ടി.യു സമരത്തിൽനിന്ന്​ വിട്ടുനിൽക്കുമെന്ന്​ പറഞ്ഞെങ്കിലും ആരും ജോലിക്കെത്തിയില്ല. കോഴിക്കോട്​ ഡി​പ്പോയിൽനിന്നുള്ള 67ൽ നാലു​ ദീർഘദൂര ബസുകൾ മാത്രമാണ്​ ഓടിയത്​. തൊട്ടിൽപാലം, വടകര, താമരശ്ശേരി, തിരുവമ്പാടി ഡിപ്പോകളിൽനിന്ന്​ ഒരു ബസ്​ പോലും പുറപ്പെട്ടില്ല. 192 ബസുകളാണ്​ ജില്ലയിലെ അഞ്ചു​ ഡിപ്പോകളിൽനിന്ന്​ സർവിസ്​ നടത്തുന്നത്​. ഏതാണ്ട്​ 20 ലക്ഷം രൂപയാണ്​ പ്രതിദിന കലക്ഷൻ. ഭരണാനുകൂല സംഘടനയായ സി.ഐ.ടി.ഇ.എക്ക്​ വലിയ സ്വാധീനമുള്ള ജില്ലയാണ്​ കോഴിക്കോട്​. സി.ഐ.ടി.യു സമരത്തിൽനിന്ന്​ വിട്ടുനിൽക്കുമെന്ന്​ പ്രഖ്യാപിച്ചെങ്കിലും അനുയായികളും നേതാക്കളും അനുസരിച്ചില്ല. എല്ലാവരും സമരത്തിൽ പ​ങ്കെടുത്തതോടെ ആയിരക്കണക്കിന്​ യാത്രികരാണ്​ വഴിയാധാരമായത്​. കെ.എസ്​.ആർ.ടി.സിയെ മാത്രം ആശ്രയിക്കുന്ന മലയോര മേഖലയിലെ യാത്രക്കാർ വലിയ പ്രയാസമാണ്​ അനുഭവിച്ചത്​. സ്വകാര്യ വാഹനങ്ങൾ കൂടുതൽ റോഡിലിറങ്ങിയത്​ ഗ്രാമങ്ങളിലടക്കം ഗതാഗതക്കുരുക്കിന്​ ഇടയാക്കി. ksrtc bus stand തൊഴിലാളിസമരത്തെ തുടർന്ന്​ വിജനമായ കോഴിക്കോട്​ കെ.എസ്​.ആർ.ടി.സി ബസ്​ സ്റ്റാൻഡ്