റെയിൽ ട്രാക്കിന്​ സമീപത്തെ മാലിന്യക്കൂമ്പാരം ഭീഷണി

കോഴിക്കോട്​: റെയിൽ ട്രാക്കിന്​ സമീപം മാലിന്യം കുന്നുകൂട്ടിയിട്ടത്​ ഭീഷണിയാകുന്നു. മാനാഞ്ചിറയിലെ ആർട്ട്​ ഗാലറിക്ക്​ പിൻഭാഗത്തായാണ്​ കുന്നോളം മാലിന്യമുള്ളത്​.​ ഇതിന്​ തീപിടിച്ചാൽ വൻ ദുരന്തമാകുമെന്നാണ്​ സമീപങ്ങളിലെ വ്യാപാരികളടക്കം പറയുന്നത്​. ആർട്ട്​ ഗാലറി റോഡിലെ വൃക്ഷങ്ങളുടെ ഇലകളടക്കം ഇവിടേക്കാണ്​ കൂട്ടിയിടുന്നത്​. മാത്രമല്ല പ്ലാസ്റ്റിക്​ മാലിന്യങ്ങളും വലിയതോതിൽ തള്ളുന്നുണ്ട്​. സിനിമ ഹാളിന്‍റെ പിൻഭാഗത്തായാണ്​ വലിയ മാലിന്യക്കൂമ്പാരമുള്ളത്​. നേരത്തെ ഇവിടെ തീപിടിത്തമുണ്ടായി​ ട്രെയിനുകളടക്കം പിടിച്ചിടുന്ന സ്ഥിതിയുണ്ടായിരുന്നു. ഉണങ്ങിക്കിടക്കുന്ന മാലിന്യത്തിലേക്ക്​ ആരെങ്കിലും കത്തുന്ന സിഗരറ്റ്​ കുറ്റിയിട്ടാൽ പോലും വലിയ തീപിടിത്തമുണ്ടാകും. നിരവധിപേർ പുകവലിക്കാനെത്തുന്ന ഭാഗം കൂടിയാണ് റെയിൽ ട്രാക്കിനു സമീപത്തെ ഈ ആളൊഴിഞ്ഞ ഭാഗം. കടപുഴകിയതും കൊമ്പൊടിഞ്ഞതുമായ നിരവധി മരങ്ങളും ഇവിടെ കിടപ്പുണ്ട്​. റെയിലിന്‍റെ എതിർ ഭാഗത്തും മാലിന്യമുണ്ട്​. മറ്റുപ്രദേശങ്ങളിൽ നിന്ന്​ വിഭിന്നമായി റെയിൽ ട്രാക്കിനോട്​ ചേർന്നു​കൊണ്ടാണ്​ ഇവിടത്തെ മാലിന്യനിക്ഷേപം. ഏറെകാലമായി ആരും തിരിഞ്ഞുനോക്കാത്തതിനാലാണ്​ മാലിന്യം ഇത്രകണ്ട്​ കൂടിയത്​. മാലിന്യം നീക്കംചെയ്യാൻ അടിയന്തര നടപടിയുണ്ടാവണമെന്നാണ്​ സമീപത്തെ കച്ചവടക്കാർ ആവശ്യപ്പെടുന്നത്​.