സംഘ്പരിവാറിനായി പൊലീസിൽ 'തത്ത്വമസി' പ്രവർത്തിക്കുന്നു -എം.കെ. മുനീർ

കോഴിക്കോട്​: സംസ്ഥാന പൊലീസിൽ സംഘ്പരിവാർ പിടിമുറുക്കുന്നതായും ഇവർക്കായി സേനയിൽ 'തത്ത്വമസി' എന്ന സംഘടന പ്രവർത്തിക്കുന്നതായും ഡോ. എം.കെ. മുനീർ എം.എൽ.എ. സർക്കാർ നയത്തിനു വിരുദ്ധമായി പ്രവർത്തിക്കുന്ന ഇതിന്റെയാളുകൾ കന്യാകുമാരിയിൽ നടക്കുന്ന ശിബിരങ്ങളിൽ ​പ​ങ്കെടുക്കുന്നുണ്ടെന്നും അദ്ദേഹം പറഞ്ഞു. സി.എ.എ -എൻ.ആർ.സി സമരക്കേസുകൾ​ പിൻവലിക്കു​മെന്ന്​​ പറഞ്ഞ്​ പിണറായി സർക്കാർ വഞ്ചിച്ചവർക്ക്​ കോടതിയിൽ പിഴയടക്കാനുള്ള യൂത്ത്​ ലീഗിന്റെ സാമ്പത്തിക സഹായം വിതരണം ചെയ്​ത്​ സംസാരിക്കുകയായിരുന്നു മുനീർ. സി.പി.എം സംസ്ഥാന സെക്രട്ടറി കോടിയേരി ബാലകൃഷ്​ണൻ ​തന്നെ പൊലീസിലെ സംഘ്പരിവാർ സാന്നിധ്യം ചൂണ്ടിക്കാട്ടിയിട്ടുണ്ട്​. സി.എ.എ സമരവുമായി ബന്ധപ്പെട്ട്​ ആർക്കെതിരെയും കേസുണ്ടാവില്ലെന്നാണ്​ മുഖ്യമന്ത്രി നിയമസഭയെ അറിയിച്ചത്​. നിയമസഭയെ ​തെറ്റിദ്ധരിപ്പിച്ചതിന്​ മുഖ്യമന്ത്രിക്കെതിരെ അവകാശ ലംഘനത്തിന്​ നോട്ടീസ്​ നൽകും. സി.എ.എ നടപ്പാക്കണമെന്നാവശ്യപ്പെട്ട്​ കുറ്റ്യാടിയിൽ സമരം നടത്തി ഗുജറാത്ത്​ ആവർത്തിക്കുമെന്ന്​ വ്യാപാരികളോട്​ പ്രഖ്യാപിച്ചിട്ടും സംഘ്പരിവാറിനെതിരെ കേ​സെടുത്തില്ല. എന്നാൽ സംഘ്​പരിവാറിനെതിരെ പ്രവർത്തിച്ച യൂത്ത്​ ലീഗുകാരെ ജയിലിലടച്ചു. ആർ.എസ്​.എസും എസ്​.ഡി.പി.ഐയും ഒരുപോലെയാണ്​. ഇരുവരുമുണ്ടാക്കുന്ന സംഘർഷങ്ങൾ കേരള​ത്തെ ദ്രുവീകരണത്തിലേക്ക്​ നയിക്കും. മുസ്​ലിം സമുദായത്തിന്റെ പ്രശ്​നങ്ങളെ നേരിടുന്നവരല്ല എസ്​.ഡി.പി.ഐ. തെര​െഞ്ഞടുപ്പിൽ എസ്​.ഡി.പി.ഐ -ആർ.എസ്​.എസ്​ വോട്ടുവേ​ണ്ടെന്നതാണ്​ ലീഗിന്റെ നിലപാട്​. ഇതിന്റെ പേരിൽ തോറ്റാൽ അന്തസ്സായി കരുതി വീട്ടിലിരിക്കുമെന്നും അദ്ദേഹം പറഞ്ഞു. വിവിധ ജില്ലകളിലെ യൂത്ത്​ ലീഗ്​ പ്രവർത്തകരായ 114 പേർക്ക്​ പിഴയിനത്തിൽ ചെലവായ 4,51,600 രൂപയാണ്​ വിതരണം ചെയ്തത്​. യൂത്ത്​ ലീഗ്​ സംസ്ഥാന ജനറൽ ​സെക്രട്ടറി പി.കെ. ഫിറോസ്​ അധ്യക്ഷത വഹിച്ചു. ട്രഷറർ പി. ഇസ്മായിൽ, വൈസ്​ പ്രസിഡന്‍റ്​ അഷ്‌റഫ്‌ എടനീർ, സെക്രട്ടറി ഗഫൂർ കോൽക്കളത്തിൽ, മിസ്ഹബ് കീഴരിയൂർ, സഹീർ ആസിഫ്, നസീർ നല്ലൂർ, പി.സി. നസീർ, കെ.എം.എ. റഷീദ് എന്നിവർ സംസാരിച്ചു.