ഷിഗെല്ല; ഉറവിടം ഉറപ്പിക്കാനാകാതെ ആരോഗ്യ വകുപ്പ്​

കോഴിക്കോട്​: ഷിഗെല്ല കേസുകൾ ജില്ലയിൽ ഇടക്കിടെ വന്നു പോകാറുണ്ടെങ്കിലും ഉറവിടം കൃത്യമായി കണ്ടെത്താൻ സാധിക്കാതെ ആരോഗ്യ വകുപ്പ്​. 2020 മുതൽ എല്ലാ വർഷവും ജില്ലയിൽ ഷിഗെല്ല കേസുകൾ റിപ്പോർട്ട്​ ചെയ്യുന്നുണ്ട്​. രോഗം റിപ്പോർട്ട്​ ചെയ്യുമ്പോൾ ക്ലോറിനേഷൻ ഉൾപ്പെടെയുള്ള ശുദ്ധീകരണ പ്രക്രിയകളും പ്രദേശത്തെ ജനങ്ങൾക്ക്​ മാത്രമുള്ള ബോധവത്​കരണങ്ങളും നടത്താറുണ്ടെങ്കിലും അടിസ്ഥാന കാരണം തിരയുകയോ രോഗം ഇനിയുണ്ടാകാതിരിക്കാനുള്ള നടപടികൾ സ്വീകരിക്കാനോ ആരോഗ്യ വകുപ്പ്​ തയാറാകുന്നില്ല. കോവിഡിനിടെ 2020 ഡിസംബറിൽ മായനാട്​ മുണ്ടിക്കൽത്താഴം കൊട്ടംപറമ്പിൽ 11 വയസ്സുകാരൻ ഷിഗെല്ല ബാധിച്ച്​ മരിച്ചതോടെയാണ്​ ജില്ലയിൽ ഭീതി പടരാൻ തുടങ്ങിയത്​. രോഗം പടർന്നത്​ വെള്ളത്തിലൂടെയാണെന്നാണ്​ അന്ന്​ ഡോക്ടർമാർ നിഗമനത്തിലെത്തിയത്​. ക​ഴിഞ്ഞ ദിവസം എരഞ്ഞിക്കലിലും അത്തോളിയിലും കുട്ടികൾ​ ഷിഗെല്ല ലക്ഷണങ്ങളോടെ ചികിത്സ തേടിയിരുന്നു. എന്നാൽ കിണർ വെള്ളത്തിൽ മലിന ജലം കലർന്നതാവാം എ​ന്ന നിഗമനം മാത്രമാണ്​ ആരോഗ്യ വകുപ്പിന്​ മുന്നിലുള്ളത്​. എങ്ങനെയാണ്​ കിണർ വെള്ളത്തിൽ മലിന ജലം കലരുന്നതെന്നോ, എവിടെ നിന്നാണ്​ രോഗം വ്യാപിക്കുന്നതെന്നോ ആരോഗ്യ വകുപ്പിന്​ തീർച്ചയില്ല. മുമ്പുണ്ടായ ഷിഗെല്ല കേസിൽ ഡോക്ടർമാരുടെ സംഘം പഠനം നടത്തി റിപ്പോർട്ട്​ സമർപ്പിച്ചിരുന്നെങ്കിലും അതു വാങ്ങി ഫയലിൽ സൂക്ഷിക്കുന്നതിനപ്പുറം ജില്ലയിൽ ഇനി രോഗ വ്യാപനം ഉണ്ടാകാതിരിക്കാൻ വേണ്ടനടപടികളൊന്നും അധികൃതർ ശ്രദ്ധിക്കുന്നില്ല.