പുതിയ കെട്ടിടങ്ങൾ വരുമ്പോഴും ജീവനക്കാരില്ലാതെ മെഡിക്കൽ കോളജ്​ ആശുപത്രി

കോഴിക്കോട്​: മെഡിക്കൽ കോളജ്​ ആശുപത്രിയിൽ ജീവനക്കാരുടെ ക്ഷാമം രൂക്ഷം. പുതിയ പുതിയ കെട്ടിടങ്ങൾ നിർമിക്കുമ്പോഴും പുതിയ തസ്തികകളോ ജീവനക്കാരെയോ നിയമിക്കാതെയാണ്​ പ്രവർത്തനങ്ങൾ തുടങ്ങുന്നത്​. മെഡിക്കൽ കോളജ്​ ആശുപത്രിയിൽ പി.എം.എസ്​.എസ്​.വൈ ബ്ലോക്ക്​ മൂന്ന്​ മാസത്തിനകം പ്രവർത്തനം ആരംഭിക്കുമെങ്കിലും പുതിയ ജീവനക്കാരെ നിയമിച്ചിട്ടില്ല. ഏഴുനില കെട്ടിടത്തിൽ അത്യാഹിത വിഭാഗവും എമർജൻസി ഓപറേഷൻ തിയറ്ററുമടക്കമാണ്​ പ്രവർത്തിക്കുന്നത്​. ഐ.സി.യുകൾ, വാർഡുകൾ തുടങ്ങിയ സംവിധാനങ്ങൾ ഇവിടെ ഒരുക്കുന്നുണ്ട്​. എന്നാൽ, ശുചീകരണ തൊഴിലാളികൾ ഉൾപ്പെടെയുള്ള അടിസ്ഥാന ജീവനക്കാർ മാത്രം കൂടുതലില്ല. മെഡിക്കൽ കോളജിൽതന്നെ ആവശ്യത്തിന്​ ജീവനക്കാരില്ലാതിരിക്കുമ്പോൾ പുതിയ ഏഴ്​ നില കെട്ടിടത്തിലേക്കുകൂടി ആ ജീവനക്കാരെ നിയമിക്കേണ്ടി വരുന്നത്​ ആശുപത്രിയുടെ ശുചിത്വത്തെ ഉൾപ്പെടെ ബാധിക്കും. മെഡിക്കൽ കോളജ്​ ആശുപത്രിയിൽ ഉള്ള ജീവനക്കാരെ പല വിധത്തിൽ എല്ലായിടങ്ങളിലേക്കും മാറ്റി ക്രമീകരിച്ചാണ്​ ആശുപത്രിയുടെയും സൂപ്പർ സ്​പെഷാലിറ്റിയുടെയും പ്രവർത്തനങ്ങൾ നിലവിൽ നടത്തുന്നത്​. 1969ൽ ഉള്ള സ്റ്റാഫ്​ പാറ്റേണാണ്​ ആശുപത്രിയിൽ ഇപ്പോഴും നിലനിൽക്കുന്നത്​. 1969ലെക്കാൾ രോഗികളുടെ എണ്ണം പതിന്മടങ്ങ്​ വർധിച്ചിട്ടും ജീവനക്കാരുടെ എണ്ണം മാത്രം വർധിച്ചിട്ടില്ല. മെഡിക്കൽ കോളജിലെ ജീവനക്കാരെയാണ്​ സൂപ്പർ സ്​പെഷാലിറ്റിയിലേക്കും നിയമിക്കുന്നത്​. നഴ്​സുമാർ, നഴ്​സിങ്​ അസിസ്റ്റന്‍റുമാർ, ശുചീകരണ തൊഴിലാളികൾ തുടങ്ങി എല്ലാ വിഭാഗം ജീവനക്കാരും രണ്ട്​ ആശുപത്രികളിലുമായി ഓടുകയാണ്​. അതിനിടെയാണ്​ പി.എം.എസ്​.എസ്​.വൈ ബ്ലോക്കുകൂടി തുറക്കുന്നത്​. ഏപ്രിലിൽ തുറക്കുമെന്ന്​ പറഞ്ഞിരുന്ന ബ്ലോക്ക്​ മൂന്നുമാസം കഴിഞ്ഞ്​ മാത്രമേ തുറക്കുന്നുള്ളൂ. എങ്കിലും ഇവിടേക്കും ജീവനക്കാരെ പുതുതായി നിയമിച്ചിട്ടില്ല.