കുഷ്ഠരോഗ നിർമാർജനത്തിന്​ ബാലമിത്രയുമായി ആരോഗ്യവകുപ്പ്​

കോഴിക്കോട്‌: കുഷ്ഠരോഗം നേരത്തെ കണ്ടെത്തി ചികിത്സിക്കാൻ സ്കൂളുകളിൽ തന്നെ പരിശോധനാ സംവിധാനം തുടങ്ങുന്നു. ബാലമിത്ര എന്ന്​ പേരിട്ട പദ്ധതി ആരോഗ്യവകുപ്പും വനിതാ ശിശുക്ഷേമ വകുപ്പും ചേർന്ന്​ കുഷ്ഠരോഗ നിർമാർജനം ലക്ഷ്യമിട്ട്​ നടപ്പാക്കും. വിദ്യാഭ്യാസ-തദ്ദേശ -സാമൂഹിക നീതി, ഇൻഫർമേഷൻ ആൻഡ്‌ പബ്ലിക്‌ റിലേഷൻ വകുപ്പുകൾ, ഐ.ടി അറ്റ്‌ സ്‌കൂൾ തുടങ്ങിയവയുടെ സഹകരണത്തിലാണ്‌ പദ്ധതി നടപ്പാക്കുക. അംഗൻവാടികളും സ്കൂളുകളും കേന്ദ്രീകരിച്ച്​ പരിശോധനകൾ നടത്തി രോഗം നേരത്തെ കണ്ടെത്തുന്നതാണ്​ പദ്ധതി. അടുത്ത അധ്യയനവർഷം മുതൽ പദ്ധതി നടപ്പാക്കും. കോവിഡ്​ കാലത്ത്​ രണ്ടു വർഷത്തോളം സ്കൂളുകൾ ഇല്ലാ​തെയിരുന്നതിനാൽ കുട്ടികൾക്കിടയിലെ രോഗബാധയുടെ സർവേ നടത്താനായിരുന്നില്ല. ഇത്‌ പരിഹരിക്കാനാണ്‌ ബാലമിത്ര നടപ്പാക്കുന്നതെന്ന്‌ സ്‌റ്റേറ്റ്‌ ലെപ്രസി ഓഫിസർ ഡോ. കെ.ആർ. വിദ്യ പറഞ്ഞു. ആരോഗ്യവകുപ്പിന്‍റെ സജീവ ഇടപെടലിനാൽ കുട്ടികളിലെ രോഗവ്യാപനത്തോത്‌ ഈ വർഷം 0.47 ശതമാനമായി കുറഞ്ഞിരുന്നു. രോഗം പൂർണമായി നിർമാർജനം ചെയ്യുക എന്നതാണ്​ ലക്ഷ്യം. രോഗം നേരത്തെ കണ്ടെത്തുന്നതുവഴി തുടക്കംതന്നെ ചികിത്സ ആരംഭിക്കാനും രോഗികൾക്ക്​ വൈകല്യങ്ങൾ ഉണ്ടാകുന്നത്​ തടയാനും സാധിക്കും. ഈ ഉദ്ദേശ്യത്തോടെയാണ് ​സ്കൂളുകളിൽ ബാലമിത്ര നടപ്പാക്കുന്നത്​. പദ്ധതി നടപ്പാക്കുന്നതിന്‍റെ മുന്നോടിയായി സ്കൂൾ അധ്യാപകർ, അംഗൻവാടി ഹെൽപർമാർ, വർക്കർ എന്നിവർക്ക്​ ബോധവത്​കരണം നൽകും. പദ്ധതിയുടെ പ്രതിവാര റിപ്പോർട്ടുകൾ സ്‌റ്റേറ്റ്‌ ലെപ്രസി യൂനിറ്റ്‌ ശേഖരിച്ച്‌ വിലയിരുത്തും. പദ്ധതിയുടെ ഭാഗമായി ഹ്രസ്വചിത്രവും ഒരുക്കുന്നുണ്ട്‌.