എയിംസ്​ പ്രതീക്ഷകൾക്ക്​ ചിറകുമുളക്കുന്നു

​ കോഴിക്കോട്​: രാജ്യത്തെ മുൻനിര മെഡിക്കൽ ​​പഠന, ​ഗവേഷണ, ചികിത്സ സ്​ഥാപനമായ എയിംസ്​​ (ഓൾ ഇന്ത്യ ഇൻസ്​റ്റിറ്റ്യൂട്ട്​ ഓഫ്​ മെഡിക്കൽ സയൻസസ്​) കേരളത്തിലും സ്​ഥാപിക്കാൻ അനുമതിക്കായി കേന്ദ്ര ആരോഗ്യവകുപ്പ്​ കേന്ദ്ര ധനകാര്യ മന്ത്രാലയത്തിന്​ അപേക്ഷ നൽകിയത്​ കിനാലൂരിനും പ്രതീക്ഷ വർധിപ്പിക്കുന്നു. കേരളത്തിന്​ എയിംസ്​ അനുവദിക്കാമെന്ന് കഴിഞ്ഞ ഒക്​ടോബറിലും കേന്ദ്ര ആരോഗ്യവകുപ്പ്​ ​ അധികൃതർ ധനകാര്യവകുപ്പിന് ശിപാർശ നൽകിയിരുന്നു. ഇതിന്​ പിന്നാലെയാണ്​ കഴിഞ്ഞദിവസം ആരോഗ്യ സഹമന്ത്രി ​ ലോക്സഭയിൽ രേഖാമൂലം മറുപടി നൽകിയത്​. ബാലുശ്ശേരിക്കടുത്ത്​ കിനാലൂരിൽ സംസ്​ഥാന വ്യവസായ വികസന കോർപറേഷ​ന്റെ (കെ.എസ്.ഐ.ഡി.സി) ഉടമസ്​ഥതയിലുള്ള 200 ഏക്കർ ഭൂമിയിലും സമീപത്തെ സ്വകാര്യ വ്യക്​തികളുടെ ഭൂമിയിലുമാണ്​​ എയിംസ്​ അനുവദിച്ചാൽ പ്രവർത്തനം തുടങ്ങുകയെന്ന്​ സംസ്ഥാന സർക്കാർ നേരത്തേ പ്രഖ്യാപിച്ചിരുന്നു. അതേസമയം, നാലു​ സ്ഥലങ്ങളാണ്​ നിർദേശിച്ചതെന്നാണ്​ കേന്ദ്രമന്ത്രിയുടെ മറുപടിയിലുള്ളത്​. പട്ടികയിലില്ലാത്ത കാസർകോട്​ എയിംസ്​ സ്ഥാപിക്കണമെന്ന സമ്മർദം ശക്തമാണ്​. എൻഡോസൾഫാൻ ദുരിതബാധിതരുടെ പ്രശ്​നങ്ങളടക്കം ചൂണ്ടിക്കാട്ടിയാണ്​ കാസർകോടിന്‍റെ ആവശ്യം. മലബാറിലെയും ദക്ഷിണ കന്നഡയിലെയും കോയമ്പത്തൂർ, നീലഗിരി തുടങ്ങി തമിഴ്​നാടി​ന്‍റെ ഭാഗങ്ങളിലുള്ളവർക്കും വിദഗ്​ധ ചികിത്സക്ക്​ ഏറെ സഹായകമാകുന്നതാണ്​ എയിംസ്​. 750 കിടക്കകളുള്ള ആശുപത്രിയിൽ നൂറിലേറെ എം.ബി.ബി.എസ്​ സീറ്റുകളുണ്ടാവും. വിവിധ സൂപ്പർ സ്​പെഷാലിറ്റി വിഭാഗങ്ങളും നഴ്​സിങ്​ കോളജും ചേരുമ്പോൾ വിദഗ്​ധ ചികിത്സ തേടുന്നവർക്കും മലയാളി വിദ്യാർഥികൾക്കും ഏറെ സഹായകരമാകും. നിരവധി പേർക്ക്​ ജോലിക്കും അവസരമൊരുങ്ങും. സംസ്​ഥാനം സ്​ഥലമേറ്റെടുത്തു​ കൊടുത്തശേഷം 1500ഓളം കോടി രൂപ കേന്ദ്രം ചെലവാക്കിയാൽ എയിംസ്​ യാഥാർഥ്യമാകും. കിനാലൂരിൽ 1995ല്‍ കൊച്ചിന്‍ മലബാര്‍ എസ്റ്റേറ്റ് ഗ്രൂപ്പില്‍നിന്നും കെ.എസ്.ഐ.ഡി.സി അക്വയര്‍ ചെയ്ത ഭൂമിയില്‍നിന്ന് 30 ഏക്കർ ഡൊമിനിക് പ്രസ​ന്റേഷന്‍ സംസ്​ഥാന കായികമന്ത്രിയായിരുന്നപ്പോൾ ഉഷ സ്‌കൂള്‍ ഓഫ് അത്‌ലറ്റിക്‌സിന് കൈമാറിയിരുന്നു. ശേഷിക്കുന്ന 284 ഏക്കറിൽ 70 ഏക്കറോളം ഫൂട്​വെയർ പാർക്കിനായും കൈമാറി. ബാക്കിയുള്ള ഭൂമിയാണ്​ എയിംസിനായി കണ്ടുവെച്ചത്​. സ്വകാര്യവ്യക്​തികളിൽനിന്ന്​ സ്ഥലം ഏറ്റെടുക്കാനുള്ള നടപടികളും തുടങ്ങിയിട്ടുണ്ട്​. എം.കെ. രാഘവൻ എം.പിയാണ്​ ആദ്യമായി എയിംസിനുവേണ്ടി ലോക്സഭയിലും കേന്ദ്രമന്ത്രിമാരുടെ ഓഫിസിലും എയിംസി​നായി നിരന്തരം ആവശ്യമുന്നയിച്ചത്​​. ബാലുശ്ശേരി എം.എൽ.എയായി കെ.എം. സചിൻ ദേവ്​ എത്തിയശേഷം സംസ്​ഥാന സർക്കാറി​ന്‍റെ സർവേ നടപടികൾക്കടക്കം വേഗം വർധിച്ചിരുന്നു. പ്രധാനമന്ത്രി നരേന്ദ്ര മോദിക്ക്​ മുഖ്യമന്ത്രി പിണറായി വിജയ​ന്റെ നേതൃത്വത്തിൽ നിവേദനവും സമർപ്പിച്ചിരുന്നു. നഗരത്തിൽനിന്ന് 31 കിലോമീറ്ററും നിർദിഷ്ട മലയോര ഹൈവേയിൽനിന്ന് എട്ടര കിലോമീറ്ററുമാണ് കിനാലൂരിലേക്കുള്ളത്. ജപ്പാൻ കുടിവെള്ള പദ്ധതിയുള്ളതിനാൽ ആവശ്യത്തിന്​ വെള്ളവും ലഭിക്കും. കെ.എസ്​.ഇ.ബിയുടെ സബ്​സ്​റ്റേഷനുമുണ്ട്​.