മഞ്ചേശ്വരം തെരഞ്ഞെടുപ്പ്​ കോഴ: കുറ്റപത്രം തയാർ, സമർപ്പിക്കാൻ മടി

കാസർകോട്​: ബി.ജെ.പി സംസ്ഥാന പ്രസിഡന്‍റ്​ കെ. സുരേന്ദ്രന്‍ പ്രതിയായ മഞ്ചേശ്വരം തെരഞ്ഞെടുപ്പ്​ കോഴക്കേസില്‍ കുറ്റപത്രം തയാറായിട്ടും കോടതിയിൽ സമർപ്പിക്കാൻ വൈകുന്നു. കുറ്റപത്രം തയാറാക്കി ആഴ്ചകൾ പിന്നിട്ടിട്ടും ക്രൈംബ്രാഞ്ച്​ മേധാവിയുടെ അനുമതിയും കാത്തിരിക്കുകയാണ്​ അന്വേഷണ സംഘം. കേസ്​ അകാരണമായി വൈകിപ്പിക്കുന്നുവെന്ന ആരോപണം ശരിവെക്കുന്നതാണ്​ ക്രൈംബ്രാഞ്ച്​ നടപടി. മഞ്ചേശ്വരം മണ്ഡലത്തിൽ ബി.എസ്.പി സ്ഥാനാർഥിയായിരുന്ന കെ. സുന്ദരയെ​ ഭീഷണിപ്പെടുത്തി രണ്ടര ലക്ഷം രൂപയും സ്മാര്‍ട്ട് ഫോണും നൽകി പത്രിക പിൻവലിപ്പിച്ചെന്നാണ്​ കേസ്​. കെ. സുരേന്ദ്രനുപുറമെ യുവമോര്‍ച്ച മുന്‍ സംസ്ഥാന ട്രഷറര്‍ സുനില്‍ നായ്ക്​, ബി.ജെ.പി കാസർകോട്​ ജില്ല മുൻ പ്രസിഡന്‍റ് കെ. ബാലകൃഷ്ണ ഷെട്ടി, മറ്റ്​ ഭാരവാഹികളായ സുരേഷ് നായ്ക്​, കെ. മണികണ്ഠ റൈ, ലോകേഷ് ലോഡ എന്നിവരെ പ്രതികളാക്കിയാണ്​ കുറ്റപത്രം തയാറാക്കിയത്​. ക്രൈംബ്രാഞ്ച് ഡിവൈ.എസ്​.പി എ. സതീഷ് കുമാറിന്‍റെ നേതൃത്വത്തിലുള്ളതാണ്​ അന്വേഷണ സംഘം. പത്രിക പിൻവലിക്കാൻ കോഴ നൽകിയെന്നും നിർബന്ധിപ്പിച്ച്​ ഒപ്പിടുവിപ്പിച്ചെന്നും അന്വേഷണത്തിൽ ബോധ്യപ്പെട്ടെങ്കിലും പ്രതികൾക്കെതിരെ ദുർബല വകുപ്പുകൾ​ ചുമത്തി​യെന്നാണ്​ സൂചന. സുന്ദര പട്ടികജാതി വിഭാഗത്തിൽപെട്ടയാളായിട്ടും പട്ടികവർഗ പീഡന നിയമപ്രകാരം കൂടി കേസെടുക്കണമെന്ന്​ സ്​പെഷൽ പ്രോസിക്യൂട്ടർ നിർദേശിച്ചെങ്കിലും അംഗീകരിച്ചില്ല. കോഴക്കേസിൽ കഴിഞ്ഞവർഷം സെപ്​റ്റംബർ 16നാണ്​ ക്രൈംബ്രാഞ്ച്​ കെ. സുരേന്ദ്രനെ ചോദ്യം ചെയ്തത്​. തെരഞ്ഞെടുപ്പ്​ വേളയിൽ ഇദ്ദേഹം ഉപയോഗിച്ച മൊബൈൽ ഫോൺ നൽകാൻ പിന്നീട്​ ആവശ്യപ്പെട്ടെങ്കിലും ഹാജരാക്കിയിരുന്നില്ല. പത്രിക പിൻവലിക്കാൻ കോഴയായി ലഭിച്ച പണവും മൊബൈൽ ഫോണും കണ്ടെടുത്തിരുന്നു. കഴിഞ്ഞവർഷം ജൂണിലാണ്​ കോഴ സംബന്ധിച്ച്​ സുന്ദര മാധ്യമങ്ങൾക്കുമുന്നിൽ വെളിപ്പെടുത്തൽ നടത്തിയത്​. തുടർന്ന്​ മഞ്ചേശ്വരത്തെ എൽ.ഡി.എഫ്​ സ്ഥാനാർഥി വി.വി. രമേശൻ നൽകിയ ഹരജിയിൽ കോടതി അനുമതിയോടെയാണ്​ കേസെടുത്തത്​.