വേനൽ മഴയിൽ ഡെങ്കിപ്പനി ആശങ്കയും

കോഴിക്കോട്​: ​ജില്ലയിൽ വിവിധയിടങ്ങളിൽ മഴ കനത്തതോടെ ഡെങ്കിപ്പനി ആശങ്കയും പടരുന്നു. മലയോര മേഖലകളിൽ ഡെങ്കിപ്പനി ഭീഷണി നിലനിൽക്കുന്നുണ്ട്​. ഏപ്രിലിൽ മാത്രം സംസ്ഥാനത്ത്​ 77 ഡെ​ങ്കി കേസുകളാണ്​ റിപ്പോർട്ട്​ ചെയ്തത്​. നാലുമാസത്തിനിടെ സംസ്ഥാനത്ത്​ 477 ​ ഡെങ്കിപ്പനി കേസുകളാണ് സ്ഥിരീകരിച്ചത്​. കഴിഞ്ഞ ദിവസവും കോഴിക്കോട് ​കോർപറേഷനിൽ ഒരാൾ ഡെങ്കിപ്പനി ലക്ഷണങ്ങളുമായി ചികിത്സ തേടിയിട്ടുണ്ടെന്ന്​ ആരോഗ്യ വകുപ്പിന്‍റെ കണക്കുകൾ പറയുന്നു. ജില്ലയിൽ ഏപ്രിൽ 18ന്​ ഒരു ഡെങ്കി കേസും 16ന്​ രണ്ട്​ കേസും 12ന്​ നാല്​ കേസുകളും റിപ്പോർട്ട്​ ചെയ്തിട്ടുണ്ട്​. പെട്ടെന്നുണ്ടായ മഴമൂലം കവുങ്ങ്​ തോട്ടങ്ങളിലും മറ്റും പാളകൾ കൊഴിഞ്ഞുവീണുകിടക്കുന്നതും റബർ തോട്ടങ്ങളിലെ ചിരട്ടകളിലും ഉൾപ്പെടെ മഴവെള്ളം നിറഞ്ഞ്​ കൊതുകു വർധനക്ക് കാരണമായിട്ടുണ്ട്. പെട്ടെന്നുള്ള ശക്​തമായ പനി, ശക്​തമായ തലവേദന, കണ്ണുകൾക്കുപിറകിൽ വേദന, ഗുരുതരമായ സന്ധി- മസിൽ വേദന, ക്ഷീണം, ഓക്കാനം, ഛർദി, ദേഹത്ത്​ പാടുകൾ തുടങ്ങിയ ലക്ഷണങ്ങൾ ഡെങ്കിപ്പനിയുടേതാകാം. ഇത്തരം ലക്ഷണങ്ങൾ കണ്ടാൽ ചികിത്സ തേടാൻ വൈകരുത്​. ഡെങ്കിപ്പനിക്കൊപ്പം മലേറിയയും എലിപ്പനിയും ചിലയിടങ്ങളിൽ റിപ്പോർട്ട്​ ചെയ്യുന്നുണ്ട്​. ഡെങ്കി പ്രതിരോധത്തിന്,​ കെട്ടിക്കിടക്കുന്ന വെള്ളം ഒഴിവാക്കുകയാണ്​ പ്രധാനം. ആഴ്ചയിൽ ഒരിക്കൽ ഡ്രൈഡേ ആചരിക്കണം. വീട്ടിലും പരിസരത്തുമുള്ള പ്ലാസ്റ്റിക് കുപ്പികൾ, ചിരട്ട, ടയർ എന്നിവയിൽ കെട്ടിക്കിടക്കുന്ന വെള്ളം കളഞ്ഞ് ഇവ പെറുക്കി മഴകൊള്ളാത്ത ഇടങ്ങളിൽ സൂക്ഷിക്കുക. കോർപറേഷൻ മഴക്കാല പൂർവ ശുചീകരണം മേയ്​ രണ്ടാം വാരം മുതൽ ഉണ്ടാകുമെന്നാണ്​ പ്രതീക്ഷിക്കുന്നത്​. അതിനു മുമ്പുതന്നെ ഓരോരുത്തരും അവരവരുടെ വീടും പരിസരവും വൃത്തിയാക്കണമെന്ന്​ ആരോഗ്യ വകുപ്പ്​ നിർദേശിച്ചു.