കെ.എസ്​.ആർ.ടി.സി ബസ്​ സ്റ്റാൻഡ് ഉടൻ മാറ്റും

കോഴിക്കോട്​: നിർമാണത്തിലെ വൈകല്യം പരിഹരിക്കുന്നതി​ന്‍റെ ഭാഗമായി കോഴിക്കോട്​ കെ.എസ്​.ആർ.ടി.സി ബസ്​ സ്റ്റാൻഡ് ഉടൻ ഒഴിപ്പിക്കും. കോഴിക്കോട്​ മാവൂർ റോഡ്​ പുതിയ ബസ്​സ്റ്റാൻഡിലേക്കാണ്​ ബസ്​ സർവിസുകൾ തൽക്കാലം പുനഃക്രമീകരിക്കുക. ദീർഘദൂര ബസുകൾ ഇവിടെ കേന്ദ്രീകരിച്ച്​ സർവിസ്​ നടത്താനാണ്​ പദ്ധതി. ലോക്കൽ സർവിസുകൾ നഗരത്തിന്‍റെ വിവിധ ഭാഗങ്ങൾ കേന്ദ്രീകരിച്ചാവും സർവിസ്​ നടത്തുക എന്നാണ്​ വിവരം. ഡിപ്പോ പാവങ്ങാട്​ പ്രവർത്തിക്കും. ബസ്​ സ്റ്റാൻഡ് മാറ്റം സംബന്ധിച്ച്​ കോഴിക്കോട്​ കോർപറേഷന്​ കത്ത്​ നൽകാൻ നടപടികളായി. കോർപറേഷന്‍റെ അധീനതയിലാണ്​ മാവൂർ റോഡ്​ പുതിയ ബസ്​ സ്റ്റാൻഡ്. കഴിഞ്ഞ ദിവസം തിരുവനന്തപുരത്ത്​ ബസ്​ സ്റ്റാൻഡ്​ മാറ്റവും കെട്ടിടം ബലപ്പെടുത്തലും സംബന്ധിച്ച്​ യോഗം നടന്നിരുന്നു. അതിനിടെ, ബസ്​ സ്റ്റാൻഡിലെ ടീ സ്റ്റാളുകൾ പൊലീസിനെ ഉപയോഗിച്ച്​ ഒഴിപ്പിച്ചത്​ വിവാദമായിട്ടുണ്ട്​. കെട്ടിടം ലീസിനെടുത്ത അലിഫ്​ ബിൽഡേഴ്​സിന്​ ടീ സ്​റ്റാളുകൾ കൂടി കൈമാറാനുള്ള നീക്കത്തിന്‍റെ ഭാഗമാണ്​ ഒഴിപ്പിക്കൽ എന്ന ആരോപണമുയർന്നിട്ടുണ്ട്​. ബസ്​ ടെർമിനലിന്​ ബലക്ഷയമുണ്ടെന്ന ചെന്നൈ ഐ.ഐ.ടി റിപ്പോർട്ടിനെ തുടർന്നാണ്​ വീണ്ടും ബലപ്പെടുത്തൽ പ്രവൃത്തികൾക്ക്​ ഒരുങ്ങുന്നത്​. തൂണുകൾക്കും സ്ലാബിലും വിള്ളലുള്ളതിനാൽ ഉടൻ ബലപ്പെടുത്തൽ പ്രവൃത്തി ആരംഭിക്കണമെന്ന്​ ഐ.ഐ.ടി സർക്കാറിന്​ റിപ്പോർട്ട്​ നൽകിയിരുന്നു. ഈ റിപ്പോർട്ടിന്​ പിറകെ നിർമാണവും ലീസിന്​ ​കൊടുക്കലുമൊക്കെയായി ബന്ധപ്പെട്ട്​ വലിയ വിവാദം അരങ്ങേറിയതോടെ സർക്കാർ നടപടികളെല്ലാം രഹസ്യമായാണ് നടക്കുന്നത്​. ബസ്​ സ്​റ്റാൻഡ് തന്നെ ഇവിടെനിന്ന്​ ഒഴിപ്പിച്ച്​ വ്യാപാര സമുച്ചയം മാത്രമാക്കി മാറ്റാനുള്ള ഗൂഢാലോചനയാണെന്ന്​ സി.ഐ.ടി.യു വരെ ആരോപണവുമായി രംഗത്തു​ വന്നു. കെട്ടിടം ദീർഘകാലത്തേക്ക്​ പാട്ടത്തിനെടുത്ത അലിഫ്​ ബിൽഡേഴ്​സിനു വേണ്ടി കെ.ടി.ഡി.എഫ്​.സിയും കെ.എസ്​.ആർ.ടി.സിയും ഒത്തുകളിക്കുകയാണ്​ എന്നു​ വരെ തൊഴിലാളി സംഘടനകൾ ആരോപിച്ചു. പുതിയ സാഹചര്യത്തിൽ വീണ്ടും കെ.എസ്​.ആർ.ടി.സി കെട്ടിടവുമായി ബന്ധപ്പെട്ട പ്രക്ഷോഭത്തിന്​ അരങ്ങൊരുങ്ങുകയാണ്​.