ലോകം ലോകത്തെ കാണുന്നത്​ ഫോട്ടോഗ്രഫിയിലൂടെ -​കൽപറ്റ നാരായണൻ

കോഴിക്കോട്​: ലോകം ലോകത്തെ കാണുന്നത്​ ഫോട്ടോഗ്രഫിയിലൂടെയാ​ണെന്ന്​ സാഹിത്യകാരൻ കൽപറ്റ നാരായണൻ. ഫോട്ടോഗ്രാഫർ റസാഖ്​ കോട്ടക്കൽ അനുസ്മരണവും ഫോട്ടോ പ്രദർശനവും മാനാഞ്ചിറ ആർട്ട്​ ഗാലറിയിൽ ഉദ്​ഘാടനം ചെയ്യുകയായിരുന്നു അദ്ദേഹം. കേരളത്തെ നടുക്കിയ എൻഡോസൾഫാൻ ദുരിതം പോലും ചർച്ചയായത്​​ അതുസംബന്ധിച്ച ഫോട്ടോഗ്രാഫുകളിലൂടെയാണ്​. മൊബൈൽ ഫോ​ണുകൾ പ്രചരിച്ചതോടെ ഒരു പരിപാടി നടക്കുമ്പോൾ ചിറകടിപോലെയാണ്​ ചിത്രങ്ങൾ പകർത്തുന്നത്​. എന്നാൽ, കാത്തിരിപ്പാണ്​ ഓ​രോ ഫോട്ടോഗ്രാഫുകളെയും കൂടുതൽ മനോഹരമാക്കുന്നത്​. സെൻസിബിലിറ്റിയുള്ള ഫോട്ടോഗ്രാഫറായിരുന്നു റസാഖ്​. താൻ ചെയ്യുന്നതെന്താണെന്ന്​ അദ്ദേഹത്തിന്​ നന്നായി അറിയാമായിരുന്നുവെന്ന് കൽപറ്റ നാരായണൻ പറഞ്ഞു. അഡ്വ. എം.എസ്​. സജി അധ്യക്ഷത വഹിച്ചു. ഉമർ തറമേൽ, ഷാജു ജോൺ, ടി. സുന്ദർരാജ്​ എന്നിവർ സംസാരിച്ചു. പ്രശസ്ത ഫോട്ടോഗ്രാഫർമാരായ പി. മുസ്തഫ, ഷാജു ജോൺ, മധുരാജ്, അജീബ് കോമാച്ചി, മണിലാൽ പടവൂർ, മുഹമ്മദ്, അലി കോവൂർ, ഉണ്ണി കോട്ടക്കൽ എന്നിവരുടെ ഫോട്ടോ പ്രദർശനമാണ് അനുസ്മരണത്തോടനുബന്ധിച്ച്​ നടക്കുന്നത്​. ഞായറാഴ്ച വൈകീട്ട്​ നാലിന്​ പ്രശസ്ത ഗസൽ ഗായകൻ മാത്തോട്ടം മുസ്തഫയുടെ സംഗീതകച്ചേരി അരങ്ങേറും. അനുസ്മരണ പരിപാടികൾ തിങ്കളാഴ്ച സമാപിക്കും.