ഒന്നര മാസമായി അനാഥനായി കഴിഞ്ഞ യുവാവിന്​ തിരിച്ചുപോക്ക്​

കോഴിക്കോട്​: ഒന്നര മാസത്തിലേറെയായി കോഴിക്കോട്​ കുതിരവട്ടം മാനസികാരോഗ്യകേന്ദ്രത്തിൽ അനാഥനായി കഴിഞ്ഞ യുവാവിന്​ നാട്ടിലേക്ക്​ മടക്കം. ആ​​ന്ധ്രയിലെ നൈല്ലൂർ സ്വദേശി ഹരി കൃഷ്ണയാണ്​ വ്യാഴാഴ്ച കോഴിക്കോട്ടെത്തിയ പിതാവ്​ ആനന്ദ റാവുവിനും അമ്മ പദ്​​മാവതിക്കും സഹോരങ്ങളായ അനന്ദനാഥിനും അശോകിനുമൊപ്പം മടങ്ങിയത്​. മാവൂർ ഭാഗത്ത്​ അലയുന്ന നിലയിൽ കണ്ടെത്തി, മാവൂർ ​പൊലീസാണ്​ കോടതി നിർദേശപ്രകാരം ഹരി കൃഷ്ണനെ മാനസികാരോഗ്യ കേന്ദ്രത്തിലാക്കിയത്​. രോഗാവസ്​ഥ മാറിയതോടെ സാമൂഹിക പ്രവർത്തകൻ ശിവൻ കോട്ടൂളിയുടെ നേതൃത്വത്തിൽ ബന്ധുക്കളെ കണ്ടെത്താൻ ആഴ്ചകളായി അധികൃതർ നടത്തിയ ശ്രമമാണ്​ ഫലം കണ്ടത്​. താമസം നെല്ലൂരിൽ ആണെന്ന്​ മാത്രമറിയാവുന്ന യുവാവിന്‍റെ വീട്​ നെല്ലൂർ ജില്ലയിൽ ബാലാജി പൊലീസ്​ സ്റ്റേഷൻ പരിധിയിൽ അരിത്രരാജ പുരത്താണെന്ന്​ കണ്ടെത്തുകയായിരുന്നു. യുവാവിനെ കാണാതായതിന്​ സ്റ്റേഷനിൽ പിതാവ്​ പരാതി നൽകിയിരുന്നതാണ്​ കണ്ടെത്താൻ സഹായമായത്​. ഹരികൃഷ്ണയെ വീണ്ടും കാണാനായതിലുള്ള സന്തോഷം പങ്ക്​ വച്ചാണ്​ കുടുംബം നഗരം വിട്ടത്​.