അടിപടി: പൊലീസ്​ ആശുപത്രിയിലെത്തിച്ചയാൾ മുങ്ങി

കോഴിക്കോട്​: കഴിഞ്ഞ ദിവസം രാത്രി അടിപിടിക്കിടെ കുത്തേറ്റ്​ ആശുപത്രിയിൽ പ്രവേശിപ്പിച്ചയാൾ ചികിത്സയിലിരിക്കെ മുങ്ങി. മഞ്ചേരി സ്വദേശിയും ജയിൽ റോഡിനുസമീപം താമസക്കാരനുമായ ഷാജിയാണ്​ (46) ബീച്ച്​ ജനറൽ ആശുപത്രിയിൽ നിന്ന്​ മുങ്ങിയത്​. കസബ പൊലീസാണ്​ ഇയാളെ ആശുപത്രിയിലെത്തിച്ചിരുന്നത്​. തിങ്കളാഴ്ച രാത്രി 11 ഓടെ പാളയം അളകാപുരി ഹോട്ടലിനടുത്തുനിന്ന്​ ഷാജിയും മീനങ്ങാടി സ്വദേശി ഹരിദാസനും തമ്മിൽ വാക്കു​തർക്കമുണ്ടാവുകയും ഷാജിക്ക്​ പരിക്കേൽക്കുകയുമായിരുന്നു. ഹരിദാസൻ കത്തി ഉപയോഗിച്ച്​ നെറ്റിക്ക്​ കുത്തിയെന്നാണ്​ മദ്യ ലഹരിയിലായിരുന്ന ഷാജി ആശുപത്രിയിലേക്ക്​ ​കൊണ്ടുപോകവെ പൊലീസിനോട്​ പറഞ്ഞിരുന്നത്​. ഇതിനിടെ രാത്രി തന്നെ ഹരിദാസനെ പൊലീസ്​ കസ്റ്റഡിയിലെടുക്കുകയും ചെയ്​തിരുന്നു. ചൊവ്വാഴ്ച രാവിലെ ഷാജിയുടെ വിശദ മൊഴിയെടുക്കാൻ പൊലീസ്​ ആശുപത്രി​യിലെത്തിയപ്പോഴാണ്​ ഇയാൾ മുങ്ങിയ വിവരം അറിയുന്നത്​. ഇയാളുടെ താമസസ്ഥലത്തടക്കം പൊലീസ്​ അന്വേഷിച്ചെങ്കിലും കണ്ടെത്താനായിട്ടില്ല. കടംവാങ്ങിയ പണം തിരിച്ചുതരാനാവശ്യപ്പെട്ടപ്പോൾ വാക്കുതർക്കം ഉണ്ടായെന്നും തള്ളിയപ്പോൾ തല ചുമരിലിടിച്ചാണ്​ ഷാജിക്ക്​ പരിക്കേറ്റതെന്നുമാണ്​ ഹരിദാസൻ പൊലീസിന്​ മൊഴി നൽകിയത്​.