ശതാബ്​ദി നിറവിൽ പറമ്പിൽ എ.എം.എൽ.പി സ്കൂൾ

must പറമ്പിൽ ബസാർ: അക്ഷരവെളിച്ചം പകർന്ന് ഒരു നാടിനെ സാംസ്കാരിക സമ്പന്നതയിലേക്കു നയിച്ച പറമ്പിൽ എ.എം.എൽ.പി സ്കൂളിന്റെ 99ാം വാർഷികാഘോഷത്തിന്റെ ഉദ്ഘാടനവും ശതാബ്ദി ആഘോഷ പ്രഖ്യാപനവും വനംമന്ത്രി എ.കെ. ശശീന്ദ്രൻ നിർവഹിച്ചു. എൽ.എസ്.എസ് വിജയികൾക്കുള്ള ഉപഹാരവും വിദ്യാലയം നൽകുന്ന കർമശ്രേഷ്ഠ പുരസ്​​കാരാർഹരായ കെ.കെ. ഷാഹുൽ ഹമീദ്, കെ. ശ്രീരേഖ എന്നിവർക്കുള്ള പുരസ്കാര സമർപ്പണവും മന്ത്രി എ.കെ. ശശീന്ദ്രൻ നിർവഹിച്ചു. കുരുവട്ടൂർ ഗ്രാമപഞ്ചായത്ത് പ്രസിഡന്‍റ്​ എ. സരിത അധ്യക്ഷത വഹിച്ചു. ഗാനരചയിതാവ് നിധീഷ് നടേരി മുഖ്യാതിഥിയായി. പഞ്ചായത്ത് വികസന സ്റ്റാൻഡിങ് കമ്മിറ്റി ചെയർപേഴ്സൻ സിന്ധു പ്രദോഷ്, ക്ഷേമകാര്യ സ്റ്റാൻഡിങ്​ കമ്മിറ്റി ചെയർമാൻ യു.പി. സോമനാഥൻ, ബ്ലോക്ക് പഞ്ചായത്ത് മെംബർ ജയപ്രകാശൻ, വാർഡ് അംഗം പി. സുധീഷ്, കെ.കെ. ഷാഹുൽ ഹമീദ്, കെ. ശ്രീരേഖ, സി.കെ. വിനോദ് കുമാർ, വി. അഷ്റഫ് എന്നിവർ സംസാരിച്ചു. വിദ്യാർഥികളുടെ വിവിധ കലാപരിപാടികൾ അവതരിപ്പിച്ചു.