സി.പി.എം പാർട്ടി കോൺഗ്രസ്​: പി. കൃഷ്ണപിള്ളയുടെ ചിരട്ട ശിൽപവുമായി വിനോദ്​ പയമ്പ്ര

കോഴിക്കോട്​: സി.പി.എം പാർട്ടി കോൺഗ്രസ്​ പ്രചാരണത്തിന്‍റെ ഭാഗമായി പി. കൃഷ്ണപിള്ളയുടെ രൂപവും ലോഗോയും ചിരട്ടയിൽ കൊത്തിയെടുത്ത് വിനോദ് പയമ്പ്ര. മഹാഗണി മരത്തടികൊണ്ടു നിർമിച്ച പീഠത്തിലാണ്​ പി. കൃഷ്ണപിള്ളയുടെ രൂപമൊരുക്കിയത്​. പീഠത്തിൽ സി.പി.എം പാർട്ടി കോൺഗ്രസ്​ 2022 ഏപ്രിൽ 6-10 കണ്ണൂർ എന്ന് ഇംഗ്ലീഷിൽ ചിരട്ടയുപയോഗിച്ച്​ കൊത്തിവെച്ചിട്ടുമുണ്ട്​. സ്തൂപത്തിലെ അക്ഷരങ്ങളും പ്രതിമയും ഇളനീർ ചിരട്ടയിലും പാർട്ടി കോൺഗ്രസിന്റെ ലോഗോ സാധാരണ ചിരട്ടയിലുമാണ് കൊത്തിയത്​​. 28 സെ.മീ. ഉയരമുള്ള പ്രതിമയും പീഠവും നിർമിക്കാൻ 26 ദിവസമെടുത്തതായി കലക്ടറേറ്റിലെ ജീവനക്കാരൻ കൂടിയായ വിനോദ്​ പറയുന്നു. രാത്രി സമയങ്ങളിൽ ഓരോദിവസവും അഞ്ചു മണിക്കൂറോളം ചെലവഴിച്ചാണ്​ ശിൽപനിർമാണം പൂർത്തീകരിച്ചത്​. ശിൽപത്തിന്‍റെ ഉയരം ഒമ്പത്​ സെ.മീയും വീതി 5.5 സെ.മീയുമാണ്. പീഠത്തിന് 19 സെ.മീ. ഉയരവും 11 സെ.മീയുമാണ്​ വീതി. 1984ൽ സ്കൂൾ പഠനകാലത്താണ്​ ശിൽപ നിർമാണ രംഗത്തേക്ക്​ പ്രവേശിക്കുന്നത്​. ഇതിനി​ടെ മുന്നൂറിലേറെ ശിൽപം നിർമിച്ചു. 350 ചിരട്ടകൾ ഉപയോഗിച്ച്​ നിർമിച്ച ടീപോയ്​ വ​രെ ഇതിൽ ഉൾപ്പെടും. മുള, കൊതുമ്പ്​, മരത്തടി, മരവേരുകൾ, ടെറാക്കോട്ട എന്നിവയിലും ശിൽപങ്ങൾ നിർമിക്കാറുണ്ട്​. കൊത്തുപണികൾക്ക്​ യന്ത്രങ്ങളുടെ സഹായമൊന്നും തേടാത്ത വിനോദ്​ ചെറിയ അരവും വീതികുറഞ്ഞ ഉളിയുമുപയോഗിച്ചാണ്​ ശിൽപങ്ങൾ നിർമിക്കുന്നത്​. ഗാന്ധി ശിൽപം, സ്റ്റാച്യൂ ഓഫ്​ അഡാക്കോ, വർക്കർ ആൻഡ്​ കൊൽക്ക്​ഹോൾ വിമൻ എന്നിവയെല്ലാം ചിരട്ടയിൽ കൊത്തിയെടുത്ത ഇദ്ദേഹം​ സാക്ഷരത, ജലസംരക്ഷണം എന്നിവയെല്ലാം വിഷയമാക്കിയും ശിൽപങ്ങളൊരുക്കിയിട്ടുണ്ട്​. സിന്ധുവാണ് ഭാര്യ. മകൻ: ആദർശ്.