തെരുവിലെ ആരവം നോക്കി ന്യായാധിപർ തീരുമാനമെടുക്കരുത്​ -ശ്രീധരൻ പിള്ള

must കോഴിക്കോട്​: തെരുവിലെ ആരവങ്ങൾ നോക്കിയല്ല, നിയമാനുസൃതമായ നീതിനോക്കിയാണ്​ ന്യായാധിപൻ തീരുമാനമെടുക്കേണ്ടതെന്ന്​ ഗോവ ഗവർണർ അഡ്വ. പി.എസ്​. ശ്രീധരൻ പിള്ള. കോഴിക്കോട്​ ജില്ല കോടതിവളപ്പിൽ കാലിക്കറ്റ്​ ബാർ അസോസിയേഷൻ ഒരുക്കിയ ഗാന്ധിചത്വരം അനാച്ഛാദനം ചെയ്യുകയായിരുന്നു അദ്ദേഹം. തെരുവിലെ അഭിപ്രായങ്ങൾക്കനുസൃതമായി നിയമസംവിധാനം നീങ്ങരുത്​. കുറ്റത്തെ വെറുക്കൂ, കുറ്റവാളിയോട്​ ക്ഷമിക്കൂവെന്ന ഗാന്ധിവചനമാണ്​ ഓർക്കേണ്ടത്​. ഓരോ ദിവസവും ഗാന്ധി വചനങ്ങൾക്ക്​ പല തലങ്ങളിലുള്ള വായന വരുകയാണ്​. ഗാന്ധിജി അഭിഭാഷകവൃത്തിയിൽ വിജയിച്ചില്ലെന്ന തെറ്റിദ്ധാരണയുണ്ട്​. എന്നാൽ, സൗത്താഫ്രിക്കയിൽ 10,000 ഡോളറിലേറെ സമ്പാദിച്ചിരുന്ന അഭിഭാഷകനായിരുന്നു അദ്ദേഹം. ജീവിതത്തിലെ ചില നിമിഷങ്ങളുടെ പ്രത്യാഘാതം ജീവിതകാലം മുഴുവൻ നിലനിൽക്കും. ഗാന്ധിജിയുടെ ജീവിതത്തിലെ അത്തരമൊരു നിമിഷമായിരുന്നു ​ട്രെയിനിൽനിന്ന് പുറന്തള്ളപ്പെട്ടത്​. പിന്നീട്​ ഗാന്ധിജിക്ക്​ മുന്നിൽ ലോകം കീഴടങ്ങിയപ്പോഴും അതിനുള്ള ഇച്ഛാശക്​തി ലഭിച്ചത്​ ഈ നിമിഷത്തിൽ നിന്നാണ്​. ഗവർണറുടെ ഉത്തരവാദിത്തമെല്ലാം കഴിഞ്ഞാൽ വീണ്ടും കോടിതിയിൽ അഭിഭാഷക കുപ്പായമണിഞ്ഞ്​ നിൽക്കാൻ തന്‍റെ മനസ്സ്​ തുടിക്കുന്നുണ്ടെന്നും ശ്രീധരൻ പിള്ള പറഞ്ഞു. അഡ്വ. എം.എസ്. സജി അധ്യക്ഷത വഹിച്ചു. ഹൈകോടതി ജഡ്ജി പി. ഗോപിനാഥ്, ജില്ല ജഡ്ജി പി. രാഗിണി, അഡ്വ. ശ്രീകാന്ത് എന്നിവർ സംസാരിച്ചു. അഡ്വ. എം. ജയദീപ് സ്വാഗതം പറഞ്ഞു.