കൊയിലാണ്ടി ഗവ.ഗേൾസ് ഹയർ സെക്കൻഡറിയിൽ ഇനി ആൺകുട്ടികൾക്കും പ്രവേശനം

പന്തലായനി ഹയർ സെക്കൻഡറി എന്ന പേരിലാകും ഇനി സ്കൂൾ കൊയിലാണ്ടി: ഗവ. ഗേൾസ് ഹയർസെക്കൻഡറി സ്കൂളിൽ ഇനി ആൺകുട്ടികൾകൂടി പഠിക്കും. ആറു പതിറ്റാണ്ട് പിന്നിട്ട രീതി മാറ്റി സർക്കാർ ഉത്തരവ് പുറത്തിറങ്ങി. പന്തലായനി ഹയർ സെക്കൻഡറി എന്ന പേരിലാകും ഇനി സ്കൂൾ അറിയപ്പെടുക. ഇതോടെ നഗരത്തിലെ മൂന്നു ഹയർ സെക്കൻഡറിയും മിക്സഡായി. ഗവ.ബോയ്സ് ഹയർ സെക്കൻഡറി സ്കൂൾ അഞ്ചു വർഷം മുമ്പ് പെൺകുട്ടികൾക്ക് പ്രവേശനം അനുവദിച്ചു. ഗവ. മാപ്പിള ഹയർ സെക്കൻഡറി തുടക്കം മുതൽ മിക്സിഡാണ്. ഗേൾസ് സ്കൂളിൽ ആൺകുട്ടികൾക്കു കൂടി പ്രവേശനം നൽകണമെന്നത് ഏറെ കാലത്തെ ആവശ്യമാണ്. നഗരത്തിൽ 1961 ലാണ് പെൺകുട്ടികൾക്ക് പ്രത്യേക സ്കൂൾ സ്ഥാപിച്ചത്. അതുവരെ ആൺകുട്ടികളും പെൺകുട്ടികളും ഒരുമിച്ചായിരുന്നു പഠനം. ഗവ. ഗേൾസ് ഹയർ സെക്കൻഡറിയിൽ ഇപ്പോൾ യു.പി വിഭാഗത്തിൽ 508 ഉം ഹൈസ്കൂൾ വിഭാഗത്തിൽ 1026 ഉം ഹയർസെക്കൻഡറി വിഭാഗത്തിൽ 574 ഉം വിദ്യാർഥിനികൾ പഠിക്കുന്നു.