ഗതാഗതക്കുരുക്കിൽ ​ കോഴിക്കോട്

lead കോഴിക്കോട്​: പണിമുടക്കിന് ശേഷം പൊതുവാഹനങ്ങൾ നിരത്തിലിറങ്ങിയിട്ടും നഗരം ഗതാഗതക്കുരുക്കിൽ. നഗരത്തിന്‍റെ വിവിധ ഭാഗങ്ങളിൽ കഴിഞ്ഞ ദിവസം പലപ്പോഴായി രൂക്ഷ ഗതാഗതക്കുരുക്കാണ്​ അനുഭവപ്പെട്ടത്​. പാളയം, പാവമണി റോഡ്​, ചെറൂട്ടിറോഡ്​, ബീച്ച്​ റോഡിൽ മുഹമ്മദലി കടപ്പുറം ഭാഗം​, പഴയ പാസ്​പോർട്ട്​​ ഓഫിസ്​ റോഡ്​, കോർട്ട്​ റോഡ്​, റെഡ്​ ക്രോസ്​ റോഡ്​, ബാങ്ക്​ റോഡ്​, രാജാജി റോഡ്​, ജാഫർഖാൻ കോളനി റോഡ്​, മാവൂർ റോഡ്​ എന്നിവിടങ്ങളിൽ രൂക്ഷമായ തിരക്കാണ്​ അനുഭവപ്പെട്ടത്. എല്ലാവരും സ്വന്തം വാഹനങ്ങളുമായി ഇറങ്ങുന്നതിനാൽ ഓരോ ട്രാഫിക്​ സിഗ്​നലിലും നിരവധി വാഹനങ്ങളാണ്​ കുടുങ്ങിക്കിടക്കുന്നത്​. മാവൂർ റോഡ്​ നന്തിലത്ത്​ ജങ്​ഷനിലെ സിഗ്​നലിൽ വാഹനങ്ങൾ നിർത്തിയിടുമ്പോൾ മാവൂർ റോഡ്​ ജങ്​ഷൻ വരെ ഗതാഗതക്കുരുക്ക് അനുഭവപ്പെടുകയാണ്. സ്വതവേ വാഹനങ്ങൾ കുറയുന്ന ഉച്ച സമയത്ത്​ പോലും മാവൂർ റോഡിൽ ഇതേ തിരക്കാണ്. പുതിയറ ജങ്​ഷൻ മുതൽ കോംട്രസ്റ്റ്​​ ആശുപത്രിക്ക്​ മുന്നിൽ വരെ രണ്ട്​ ട്രാഫിക്​ സിഗ്​നലുകളും തിരക്ക്​ വർധിപ്പിക്കുന്നു. മിംസ്​ ആശുപത്രി മുതൽ മാങ്കാവ്​ ജങ്​ഷൻ വരെ വൈകീട്ട്​ കടുത്ത തിരക്കാണ്​ അനുഭവപ്പെട്ടത്​. തിരുവണ്ണൂർ -ഒടുമ്പ്ര -കമ്പിളിപ്പറമ്പ്​ റോഡ്​ വരെയും കുരുക്ക്​ നീണ്ടു. മിനി ബൈപാസിൽ നായർമഠം ഭാഗത്തുനിന്ന്​ തുടങ്ങിയ ഗതാഗതക്കുരുക്ക്​​ ബൈപാസ്​ ജങ്​ഷൻ വരെയുണ്ടായിരുന്നു. കോഴിക്കോട്​ -പാലക്കാട്​ ദേശീയ പാതയിൽ വട്ടക്കിണർ ജങ്​ഷൻ മുതൽ അരീക്കാട്​ ജങ്​ഷൻ വരെയും ചെറുവണ്ണൂർ മുതൽ കോയാസ്​ വരെയും കടുത്ത ഗതാഗതക്കുരുക്കിലായിരുന്നു. കോയാസ്​ -ചെറുവണ്ണൂർ ജങ്​ഷൻ ദിവസവും ഗതാഗതക്കുരുക്കിലാണ്​. രാവിലെയും വൈകീട്ടും വാഹനങ്ങൾ മണിക്കൂറുകൾ കാത്തിരിക്കേണ്ട അവസ്ഥയാണ്. കൂടുതൽ വാഹനങ്ങൾ എത്തിയത്​ ഫറോക്ക്​ പഴയപാലത്തിലെയും തിരക്കേറ്റി. രാമനാട്ടുകര ജങ്​ഷനിലും വലിയ തിരക്കായിരുന്നു. രാവിലെ ജോലിക്ക്​ പോകുന്നവരും വൈകീട്ട്​ ജോലി കഴിഞ്ഞിറങ്ങുന്നവരുമാണ്​ ഏറെയും തിരക്കിൽപെടുന്നത്​. പലയിടത്തും ട്രാഫിക്​ പൊലീസിന്‍റെ വാഹന നിയന്ത്രണം അശാസ്ത്രീയമാകുന്നുമുണ്ട്​. ഒരു ഭാഗത്തെ വാഹനങ്ങൾ തടഞ്ഞ്​ മറുഭാഗത്ത്​ വാഹനങ്ങൾ വിടുമ്പോൾ തടഞ്ഞ ഭാഗത്ത്​ ചെറുവാഹനങ്ങൾ വന്നു നിറയുകയും പോകാൻ അനുവദിക്കുന്ന ഭാഗത്തെ വാഹനങ്ങൾക്ക്​ ഇതുമൂലം കടന്നുപോകാൻ സാധിക്കാത്ത അവസ്ഥയുമുണ്ടാവുകയുമാണ്​. പലയിടങ്ങളിലും പെട്രോൾ പമ്പുകളിലും വൻ തിരക്കാണ്​ അനുഭവപ്പെട്ടത്​. നഗരത്തിൽ ചില പെട്രോൾ പമ്പുകളിൽ ഇന്ധനം തീർന്നതോടെ നഗരപ്രാന്തങ്ങളിലെ പെട്രോൾ പമ്പുകളിൽ തിരക്ക്​ വർധിക്കുകയായിരുന്നു.