ചിന്തകൾക്കും പ്രതീക്ഷകൾക്കും ചായം നൽകി നെക്സ്റ്റ്​

കോഴിക്കോട്​: കോവിഡ് ​കാലത്തുള്ള ചിന്തകൾക്കും കോവിഡിനുശേഷമുള്ള പ്രതീക്ഷകൾക്കും ചായം നൽകി അക്കാദമി ആർട്ട്​ ഗാലറിയിൽ 10 കലാകാരൻമാരുടെ ചിത്രപ്രദർശനം. നെക്സ്റ്റ്​ എന്ന്​ പേരിട്ട പ്രദർശനത്തിൽ 10 കലാകാരൻമാർ പലസമയത്ത്​ പലയിടത്തിരുന്ന്​ നിറംചാർത്തിയ ചിന്തകളാണ്​ ഉൾക്കൊള്ളിച്ചിരിക്കുന്നത്​. മനസ്സിലെ സംഘർഷങ്ങളും ആകുലതകളും ചെറിയ കാൻവാസിലേക്ക്​ പകർത്തിയിരിക്കുകയാണ്​ ജി.വി. ഗിരീഷ്​ എന്ന കലാകാരൻ. പഴയ ഫ്ലോപ്പി ഡിസ്​ക്കിലാണ്​ അദ്ദേഹം പല ചിത്രങ്ങളും വരച്ചത്​. ഒരു കുടുംബത്തി‍ൻെറ വീടെന്ന സ്വപ്നവും പ്രതീക്ഷകളുമാണ്​ പി.ജി. ഹരിഷ്​ വരച്ചത്​. തറയിടുമ്പോൾ തുടങ്ങുന്ന ആഗ്രഹങ്ങൾ ആ ചിത്രങ്ങളിൽ കാണാം. കോവിഡ്​ കാലത്തെ വിഷമങ്ങൾ വരച്ചിരിക്കുകയാണ്​ സ്വാതി ജയ്കുമാർ. തെയ്യത്തി‍ൻെറ രൂപത്തിലുള്ള മാസ്ക്​ കലയും കലാകാരന്മാരും മറഞ്ഞുപോയ കോവിഡ്​ കാലത്തെ ഓർമിപ്പിക്കുന്നതാണ്​. കോവിഡിൽ വീടിനുള്ളിലായിപ്പോയ കുട്ടിക്കാലവും അവരുടെ കളിസ്ഥലത്തേക്ക്​ എത്തിപ്പെടാനുള്ള ആഗ്രഹവും പ്രതിഫലിപ്പിക്കുന്ന ചിത്രങ്ങൾ, കുഞ്ഞു കുട്ടികൾക്കെതിരായ ശാരീരികാക്രമണങ്ങൾ, നഷ്ട പ്രതിബിംബങ്ങൾ, പുള്ളിപ്പുലിയുടെ ദിവാസ്വപ്നങ്ങൾ, കെട്ടുബന്ധങ്ങളിൽ പെട്ടുഴറുന്ന മനുഷ്യരുടെ ദുരിതങ്ങൾ, ആശ്വാസം തേടിയ ഇടത്തിൽ പതിയിരിക്കുന്ന അപകടത്തെ കാണിക്കുന്ന വൈദ്യുതി കമ്പിയിലിരിക്കുന്ന കാക്ക, ഒളിഞ്ഞിരിക്കുന്ന ചതികളെ ഓർമിപ്പിക്കുന്ന ചൂണ്ട തുടങ്ങിയ പ്രതീകങ്ങളാണ്​ പ്രദർശനത്തിലുള്ളത്​. ടി.പി. ശ്രീധരൻ, ജി.വി. ഗിരീഷ്​, അനിരുദ്ധ്​ രാമൻ, സ്വാതി ജയ്കുമാർ, സാനു രാമകൃഷ്ണൻ, പി.ജി. ഹരീഷ്​, അരുണ ആലഞ്ചേരി, സി.എസ്​. ഷിബു ചന്ദ്​, മനോജ്​ വിശ്വംഭരൻ, ടി.പി. ​രാജേഷ്​ എന്നിവരാണ്​ ചിത്രങ്ങൾ ഒരുക്കിയത്​. മാർച്ച്​ 31 വ​രെ പ്രദർശനം തുടരും.