അധ്യാപക-വിദ്യാർഥി ബന്ധം ഊഷ്മളമാക്കാൻ മെഡി. കോളജിൽ പ്രത്യേക കമ്മിറ്റി

കോഴിക്കോട്​: മെഡിക്കൽ കോളജിൽ അധ്യാപക-വിദ്യാർഥി തർക്കങ്ങൾക്ക്​ പരിഹാരം കാണാൻ പ്ര​ത്യേക കമ്മിറ്റി രൂപവത്​കരിച്ചു. ഡോ. രാജേഷ്​ പുരുഷോത്തമ‍‍ൻെറ നേതൃത്വത്തിൽ ഡോ. ഗീ​ത ഗോവിന്ദരാജ്​, ഡോ. അസ്മാബി, ഡോ. ജിഷ എന്നിവരുൾപ്പെടുന്ന കമ്മിറ്റിയിൽ വിദ്യാർഥികൾക്ക്​ അവരുടെ പ്രശ്നങ്ങളെല്ലാം അറിയിക്കാം. ഇതൊരു സ്ഥിരം കമ്മിറ്റിയാണ്​. വിദ്യാർഥികളുടെ കാമ്പസിലെയും ഹോസ്റ്റലിലെയും ക്ലാസുകളിലെയും പ്രശ്നങ്ങൾ കമ്മിറ്റിയിൽ ചർച്ച ചെയ്യും. വിദ്യാർഥികളുടെ പരാതി പഠിച്ചശേഷം അത്​ പരിഹരിക്കാനാവശ്യമായ നടപടികൾ കമ്മിറ്റി സ്വീകരിക്കുമെന്നും പ്രിൻസിപ്പൽ ഡോ. വി.ആർ. രാജേന്ദ്രൻ പറഞ്ഞു. മെഡിക്കൽ കോളജിലെ അധ്യാപക -വിദ്യാർഥി പോരി‍ൻെറ പശ്​ചാത്തലത്തിൽ, വിദ്യാർഥികളുമായുള്ള ബന്ധം ഊഷ്മളമാക്കുന്നതിനാണ്​ കമ്മിറ്റി രൂപവത്​കരിച്ചത്​. ഹോസ്റ്റൽ ചീഫ്​ വാർഡൻ പീഡിപ്പിച്ചുവെന്ന വിദ്യാർഥികളുടെ പരാതിയിൽ നടത്തിയ ​അന്വേഷണ റിപ്പോർട്ടിനെ അടിസ്ഥാനമാക്കിയാണ്​ കമ്മിറ്റി രൂപവത്​കരിച്ചത്​. വാർഡൻ വിദ്യാർഥികളെ മർദിച്ചെന്നോ ഇല്ലെന്നോ കണ്ടെത്താനായിട്ടില്ലെന്ന റിപ്പോർട്ടിൽ വിദ്യാർഥികളുടെ പരാതി പരിഹരിക്കാനും മറ്റുമായി കമ്മിറ്റി രൂപവത്​കരിക്കാനും നിർദേശമുണ്ടായിരുന്നു. അതേസമയം, വാർഡൻമാർ രാജിവെച്ച ഹോസ്റ്റലുകളിൽ പുതിയ വാർഡന്മാരെ നിയമിക്കുന്നതിന്​ സർക്കുലർ പുറത്തിറക്കിയിട്ടുണ്ടെന്ന്​ പ്രിൻസിപ്പൽ വ്യക്​തമാക്കി. മൂന്നു ​വർഷം പൂർത്തിയായ വാർഡന്മാരെയെല്ലാം മാറ്റി പുതിയ ആളുകളെ നിയമിക്കുകയാണ്​. അതിനുള്ള സർക്കുലറും തയാറാക്കിയിട്ടുണ്ട്​. എന്നാൽ, വിദ്യാർഥികൾ നിലവിലുള്ള ഹോസ്റ്റൽ നിയമങ്ങൾ പാലിക്കാൻ ബാധ്യസ്ഥരാണെന്നും പ്രിൻസിപ്പൽ പറഞ്ഞു. വാർഡൻ മർദിച്ചുവെന്ന വിദ്യാർഥികളുടെ ആരോപണം റാഗിങ്​ മറയ്ക്കാനായി കെട്ടിച്ചമച്ചതാണെന്നായിരുന്നു ചീഫ്​ വാർഡന്‍ പറഞ്ഞത്​. സംഭവത്തിൽ പ്രതിഷേധിച്ച്​ വിദ്യാർഥികൾ ആശുപത്രി വാർഡിലൂടെ പ്രകടനം നടത്തുകയും അതിനെതിരെ ഡോക്ടർമാർ പൊലീസിൽ പരാതി നൽകുകയും ചെയ്തിരുന്നു. വാർഡൻ പീഡിപ്പിച്ചെന്നാരോപിച്ച്​ വിദ്യാർഥികളും പൊലീസിനെ സമീപിച്ചു. അതിനിടെ, റാഗിങ്ങിനും മയക്കുമരുന്നിനുമെതിരെ ശക്​തമായ നിലപാടെടുത്തതാണ്​ വിദ്യാർഥികളെ പ്രകോപിപ്പിച്ചതെന്ന്​ ആരോപിച്ച്​ അഞ്ച്​ വാർഡന്മാർ രാജിവെക്കുകയും ചെയ്തു. ഈ സംഭവങ്ങളുടെ പശ്ചാത്തലത്തിലാണ്​ കമ്മിറ്റി രൂപവത്​കരിച്ചത്​.